自從葛霖喺06年騎上滙豐（005）呢隻大笨象，唔知係咪前任主席龐約翰太好，令人印象深刻，令繼任嘅葛霖一直受到抨擊，加上美國次按危機爆發，葛霖可以話係四面受敵。不過，佢終於可以吐氣揚眉，皆因大笨象揮低咗花旗，做咗「2008全球1000家大銀行」阿一。
英國雜誌《銀行家》每年會將全球銀行排名，過去幾年，榜首都係美國嘅花旗集團，大笨象總係跟住花旗後面，好似06年花旗做榜首，滙豐就排第二；到上年榜首被美國銀行取代，花旗做阿二，滙豐就跌落第三。
揮低花旗 拆Knight棚牙
不過，次按風暴仲未過，葛霖竟然可以騎住大笨象跑上榜首，呢勻仲唔威晒，佢仲可以拆咗死對頭、紐約「壞孩子」EricKnight棚牙！事緣喺葛霖上位冇耐，就被基金及機構投資者指大笨象股價飛唔起，而紐約「股壇長毛」EricKnight更衝住葛霖，去信董事局要求檢討，建議放棄美國業務，又要求葛霖轉做非執董，仲要重新檢討董事局薪酬。兩人嘅恩怨就係咁越結越厚。
葛霖亦唔係好蝦，一於唔同你客氣，好直接咁話Knight嘅建議不切實際，仲堅稱唔會放棄美國市場，兩人可謂招來招往。
同時，滙豐亦重整業務，例如多放資源喺新興市場上。今年4月，葛霖嘅努力終於有回報，滙豐登上《福布斯》全球2000強上市企業榜首。今次再下一城，可以話係大笨象發威，條尾一掃就打底晒花旗同阿Knight。
電郵：mailto:[email protected]