中國人有一句至理名言，就係「人逢喜事精神爽」，當你有一排又殘又謝嗰陣，整單紅事冲喜吓真係可以成個人唔同晒！啱啱去完度蜜月嘅朗尼呢期認真「精神爽」，喺曼聯第一場友賽就幫球隊作客以2:0打低咗鴨巴甸，洞房花燭夜返嚟之後啲體能一啲都冇輸蝕到喎！
有波入兼博到12碼
曼聯作客鴨巴甸係紅魔鬼第一場季前熱身賽，亦都係費爵爺幫鴨巴甸捧走歐洲盃賽冠軍盃嘅25周年紀念賽；不過場波嘅主角費爵爺喺入場受到觀眾歡迎之後，以隊長身份出場嘅朗尼就搶晒佢嘅風頭，狀態真係fit到你唔信。
雖然呢場只不過係熱身賽，但朗尼就一啲都冇放鬆到，開賽短短10分鐘已經有3次射門2次中目標，莫非去完度蜜月冲喜完真係咁爽？到咗上半場補時嗰陣，朗尼仲博到12碼俾卡域克射入，下半場自己仲用頭槌整多粒幫曼聯搞掂對手㖭！
搞派對同老婆嗌交
朗尼狀態咁好，佢老婆高蓮背後嘅功勞應該好大，而佢哋兩個山長水遠去完意大利度蜜月，途中又去過拉斯維加斯，肯定會舟車勞頓；再加埋洞房花燭，高蓮私底下真係幫到朗尼keep住啲體能喎。
雖然「人逢喜事精神爽」呢句說話已經證實咗真係好堅，但係小心喜事變大件事，到時就真係有排煩啦。話說朗尼同高蓮喺拉斯維加斯返嚟之後，諗住喺英國再搞多次派對，原意係想畀多啲兩家人嘅親戚一齊玩番餐啦，因為大部份人都冇跟到佢哋去意大利嘅婚禮。不過𠵱家兩家人就為派對嘅地方嘈，搞到咁都唔知點收科，佢哋嘅發言人就話派對暫時唔搞住。我求大俠就想奉勸朗尼，你𠵱家狀態咁好，千祈唔好俾派對呢單嘢搞到你冇心機踢波呀！