噚日睇電視新聞，有一則新聞令敏妮覺得應該同契大佬Kenny傾吓嘅。首先呢則新聞係講有位內地嚟、家陣已經喺香港落地生根嘅太太，佢有對孖女，兩人喺新學年都要買課本，負擔一啲都唔輕，報道話，呢位太太喺內地讀書，啲書平實好多，冇香港嘅咁花巧，當然價錢亦平一大截。
記者於是搵嚟大陸、台灣同香港嘅課本做比較，兩岸三地以香港嘅書印刷最精美，但價錢亦最貴。
開發電子課本
雖然香港課本精美，但並唔實用，因為用瓦粉紙印，如果學生寫notes落書，寫錯咗想改番，一擦就連書上嘅印刷都刷甩埋，反而唔及台灣同大陸，用一般嘅書紙。記者仲訪問咗位中學生，佢話讀幼稚園、小學嘅小朋友就話要用啲精美嘅書，吸引佢哋閱讀興趣，但讀到上中學或者更高年級，最緊要都係實用。評論可謂一針見血。其實明眼人都知，書商講包裝多過講內涵，同賣價有關，利之所在，無可厚非，人哋係書「商」，商人當然要圖利。
作為任「書商」魚肉嘅家長，可以點做呢？敏妮嘗試諗咗一啲辦法，睇吓各位家長有乜意見。
首先係運用群眾壓力。開心媽咪Dennis好鍾意上嗰啲家長網，除咗交流湊仔心得，另一個用處係集體購物，敏妮睇過另一則報道，話好多書商為學校提供一啲優惠、贊助，以便得到佢哋採用自己出版社嘅課本。唔知有冇家長會喺網上發動其他家長一齊同書商講價，增加自己嘅bargainingpower呢？正如敏妮之前都講過，今時今日要慳，互聯網係一項好重要嘅工具。
可惜書商唔上市
講開網上行動，其實家陣電子書已經好流行，一班小朋友亦都熟悉上網，敏妮相信有好多小朋友未入學，已經投入網上世界。以前文化傳信（343）都曾經開發電子課本，可惜失敗咗，如果唔係，小朋友只需要買部notebook，就可以返學，唔使捧住個重書包，仲有每年只要上載新一學年嘅課本，唔使買新書，電子書嘅成本一定比課本便宜，既環保又唔怕紙貴。
其實，任何投資都可以做對冲，家長每個學年都要為仍然在學嘅子女購買課本，可惜賣課本嘅公司冇乜邊間上市，否則每年呢個時候可能係佢哋股價上升嘅日子。
http://wanmanli.com/blogs/