昨日香港小姐12位候選佳麗出席一個宣傳奧運的活動，佳麗們更即場比拼呼拉圈、彩帶舞及跳繩，測試她們的運動細胞，結果由細細粒的11號馬賽脫穎而出，成為「現場最具動感美態佳麗」，反而身材最高的3號張舒雅卻表現雞手鴨腳，相當論盡。
本年度香港小姐12位候選佳麗昨日以一身運動裝束，出席在奧海城舉行的「香港小姐動感美態迎奧運」，活動上12位佳麗分三組比試呼拉圈，彩帶舞和跳繩等環節，當中以11號馬賽跳繩的表現最好，輕輕鬆鬆跳了近100下，其次4號高海寧玩呼拉圈的成績也不俗，反而最高大的3號張舒雅在運動方面的表現麻麻，結果最後馬賽贏得「現場最具動感美態佳麗」之殊榮。
臨近比賽漸緊張
馬賽事後表示自己一向是運動型，她說：「我好多運動都識得玩，但係未必每一樣都係專業，讀書嗰陣仲攞過跳遠季軍同接力賽冠軍！好似上一次去加勒比海拍外景，有報道話我搶鏡，其實我只係好投入咁去玩，唔係博上鏡。」馬賽更透露臨近比賽的日子，心情十分複雜，她說：「我覺得時間真係過得好快，開始覺得緊張，有時諗番都有好多回憶。」
澳洲留學身形變
對於有報道指12號黃潔婷離奇升cup2吋半，官方公佈的三圍數字與她參選前任職Model公司時的數字不同，黃潔婷說：「我都有睇過報道，Model公司時嘅三圍數字，係我19歲嗰年去登記，之後我就去咗澳洲讀書，可能生活習慣變咗，所以體重體格方面都有影響，我接受到人哋整容，不過自己就唔接受，況且我都好滿意𠵱家嘅身材，好健康呀！」
採訪：何慧斯
攝影：仇志德