市場傳聞內房股合生創展（754）前行政總裁武捷思，將過檔中國奧園（3883），擔任副主席，聽講今次武捷思加盟，係主席郭梓文三番四次誠意力邀下，先至打動到「芳心」。
點解郭梓文咁睇得起武捷思？因為武氏喺內地金融界同政府部門擁有豐富人脈關係，又任職過工行（1398）深圳分行行長，之後做過深圳市副市長同廣東省省長助理，並且喺99年，臨危受命做粵海投資（270）同廣東控股董事長，為粵海投資重組債務。
其實，武捷思今年1月中離開合生創展，過咗6個月冷河至蟬過別枝。論市值，合生創展大過奧園兩倍，達140.5億港銀，根據《福布斯》2007年中國富豪榜，合生創展主席朱孟依排名13位，身家達221.7億人仔，而奧園郭梓文只排名53位，身家84億人仔。今次武捷思肯去較細規模嘅奧園打工，相信郭梓文落咗唔少嘴頭。