無綫新劇《烈火雄心III》噚日喺鴨脷洲封街拍攝三車連環相撞嘅場面，動用幾架消防車同救護車，現場又有臨記扮血流披面嘅傷者，又有一班真嘅消防員助陣，場面好逼真。飾演消防隊目嘅王喜火速救人，其中一個鏡頭交代佢喺一團火燄前拯救傷者，熱到佢滿頭大汗。
途人誤以為真
由於大場面動用人數眾多，王喜攞500蚊出嚟萬歲請飲嘢。接拍《烈III》到𠵱家，王喜先後俾石屎擊中，隻腳又拗柴，原來嚟緊繼續有好多驚險場面，真係有排受，王喜話：「因為頭十集全部都係類似死人冚樓嘅場面，之後就會進入談情時代，冇咁辛苦，尾段會係悲情收場，其間有十集會交代我係植物人。」
由於拍攝情況逼真，有途人信以為真，王喜話：「今朝有個外籍人士經過，佢唔知我哋係拍緊戲，仲專登去買咗幾支水畀大家，後來佢知道拍戲後，我哋啲工作人員將啲水畀番佢，點知佢又真係收番，好搞笑。」