學生Ｙ考完高考與GCE，成個人鬆晒。香港高考放榜後，佢嘅成績不過不失，應該有希望入大學，至於入唔入到第一志願，當然難以預料，睇吓今年同佢競爭同一個志願同一間大學嘅考生，成績如何啦。佢父母做足兩手準備，要佢考GCE高級程度試，希望萬一香港唔掂，可以有後路去英國讀大學。左丁山睇完佢張高考成績表後，批佢一定有英國大學錄取，至於能否進入英國一級名校，要等GCE放榜。學生Ｙ話考完兩場高級程度試之後，發覺香港高考艱深好多，考GCE根本唔須要再刨書就可以應付！
既然心情輕鬆，學生Ｙ刨陶傑「黃金冒險號」特別有心機，佢中英文都考到Ｂ，叫做唔錯，唔知係唔係睇陶傑文章睇得多之功。佢睇咗陶傑寫哲學與哲學情人，不禁笑到出聲，因為佢填報大學志願時，曾填過哲學系，當時左丁山怪而問之：「乜你真係對哲學系咁有興趣？」學生Ｙ話：「一半半啦，哲學系用來做水泡啫。」
七月五日報紙報導JUPAS聯招最後改選BandA嘅數字，以學生報讀人數與學額比例計，頭四系就是：（一）嶺大哲學，一千一百八十四人，三十八對一；（二）理大社會政策及行政學，六百七十五人，二十六對一；（三）教院體育教育系，二百零四人，二十對一；（四）科大理學士（應用物理學），四百六十九人，十八對一。相信陶傑睇完啲數字，靈感大發，寫吓哲學學生，未曾不是綿裏針。
香港邊度有咁多真正哲學學生吖，想當年，不少同學入咗哲學系第一日就搵方法轉系，幾十年來，香港嘅大學哲學系被視為入大學轉系嘅踏腳石，哲學系啲教授深明此理，不以為忤，間中仲有啲學生讀一年班時受哲學老師嘅課程吸引，打消咗轉系念頭，亦有學生修讀一科哲學概論之後，決定轉過去哲學系。香港學生之讀書DNA，豈會輕易轉變，我哋從來冇見過啲會考尖子或高考狀元接受記者訪問時話要讀哲學嘅，十居其九點九都話要入醫學、環球商業、法律與管理、精算、藥劑等等。學生Ｙ話：「我哋填哲學系為志願，係防守性，如果因此而誤導陶傑，好唔好意思！」