容祖兒、蔡卓妍及鄭希怡等，前晚演出無綫《明愛暖萬心》節目，一眾青春女歌星都穿上背心裙或低胸裝演出，不過身材卻不及前輩吳君麗般玲瓏浮凸，連祖兒亦自愧不如，她自嘲即使在沙灘穿上比堅尼泳衣，也沒有人有興趣看。
無綫前晚在將軍澳電視廣播城舉行《明愛暖萬心》，一眾年輕歌手包括容祖兒、蔡卓妍（阿Sa）、鄭希怡（Yumiko）及已為人母的謝安琪（Kay）等，皆穿上背心裙、小背心露臍裝或露肩裝等示人，充滿青春氣息。但各人身材平平，反而前輩吳君麗穿上旗袍時，身材依然玲瓏浮凸，纖不盈握。
滿意身材免除負擔
祖兒也對前輩身材大讚特讚，她說：「佢真係keep得好好，好有韻味，我就冇乜好睇，即使件衫低到落肚臍都冇乜分別。」問到祖兒會否想上圍豐滿些？她笑說：「邊大邊細囉，我覺得𠵱家咁嘅身材好舒服，因為跳舞時唔會有阻礙，唔會有負擔。」有否考慮接拍豐胸廣告？祖兒笑言：「唔使客氣，我接受唔到着比堅尼泳衣拍廣告，就算我喺沙灘着比堅尼都冇人想睇。」
至於Yumiko則與陳偉霆（William）合作大跳勁舞，事後William自爆差點錫到Yumiko，而Yumiko明顯曬黑，她表示早前去沙灘曬太陽，為了膚色均勻，她更大膽地解開比堅尼泳衣帶來曬。
新書出賣初戀男友
阿Sa將在書展出書《單．親．愛》，她表示：「老竇喺書度自爆兩段戀情，我都唔知，而我會登初戀男友張相，但會搵嘢遮住佢個樣。」至於有沒有談及緋聞男友鄭中基？阿Sa笑說：「諗吓先。」她又表示出書太辛苦，這本書可能是她的絕筆。
另外張敬軒在台上忘記台詞，連累Kay接不到下去，軒仔謂：「我同Kay講咗對唔住，我都好內疚，記歌詞易過記台詞，今次係自己懶，冇背熟。」而古巨基談到好友方力申被指出入不正經的按摩店，基仔力撐好友說：「我絕對信佢唔係，識佢咁耐佢唔係有呢啲生活嘅人，我同佢通過電話，佢心情都OK，總之藝人出入要小心以免俾人誤會。」
採訪：王崇穎
攝影：葉君海