民企汽車公司吉利（175）喺6月中終於得到商務部批准，可向大股東吉利控股集團增持旗下5間汽車子公司股權到91%，呢個係重大事件，因為主席李書福兌現咗對投資者嘅承諾。
不過，公司股價依然冇咩起色，繼續喺一蚊樓下浮游，李書福於是喺6月底開記者會講近況，7月初又安排兩隊睇廠團畀內地QDII同香港證券界。上個禮拜，吉利再帶記者睇上海同浙江四個生產基地、研發中心同技術學院。
但李書福同執董洪少倫都唔見影，前者走去同正在訪華嘅墨西哥總統卡德隆見面，爭取墨西哥間廠可以攞多啲優惠，後者去咗新加坡參加投資者會議。由負責技術同科研嘅執董趙福全招呼，佢提到李主席一直全心全意做汽車，令佢好感動時，爆李書福個秘書結婚請飲，出差遲到嘅李書福坐低講兩句閒話，第三句就問身邊嘅吉利管理層，點先可以做到2015年年銷量200萬輛汽車！投入成咁，你話幾攞命呢。