C朗是否「奴隸」？不知道，只知今集《拉闊足球場》讀者對其去向確實相當關心，談到今集核心問題「假如你係C朗，想唔想離開曼聯」時，走或不走壁壘分明，茲略述如下：
今集核心問題
1.你最想邊個名將轉會，去邊？
2.假如你係C朗，想唔想離開曼聯？
3.冇波睇的周末晚上，有咩好節目？
-走-
Andy：英傳媒逼得太緊
C朗夢想係加盟皇家馬德里，雖然人哋未必歡迎你，但站喺個人角度，無妨。成日睇你哋報紙報道，話佢又去邊買別墅、買乜買物，啲英國佬（傳媒）實在逼得佢太緊，而佢當年曾經同朗尼不和，個心始終有條刺，加埋係夢想，想走亦無可厚非。
亞洲鐵人：開晒聲冇得返轉頭
皇家馬德里以前都好多條煙，搞到位置重叠晒，又欠缺好嘅防守中場，同現代足球格格不入，淨係球星多冇用。至於企喺曼聯角度，當然都想佢留低。但係，人好難講，立心要過去就冇得返轉頭，轉唔轉會始終都係睇個人，而佢開晒聲亦好難有彎轉。
-唔走-
Marco：費事孭鑊
假如皇馬買C朗，肯定要賣啲人籌旗，為一個人要調動成隊漸入佳境嘅形態，後果嚴重。假如我係C朗，加盟皇馬嘅話係就係擔到大旗，但皇馬賣走一啲主將，到時C朗要夾啲2、3線兵，瓜得，聽孭鑊。理智啲諗，都係留番喺曼聯穩陣。
無難度：咪學舒夫真高
踢波唔係踢一個人，一定要講成隊配合。C朗喺曼聯有咁多供應，梗係好。睇真啲，如果佢真係咁勁，葡萄牙就唔會攞唔到歐洲國家盃，而佢就唔會贏唔到歐國盃神射手獎啦。佢離開曼聯一定冇𠵱家咁好景。好多例子係離開踢開嗰隊就唔掂，你睇舒夫真高去到車仔衰晒就知啦。
蘋果點睇：
既然C朗喺曼聯贏盡一切，而加盟皇馬係佢夢想，不妨去證明一下自己實力。而站喺曼聯立場，趁佢高價賣走佢，亦除笨有精，只要價錢好，怕且曼聯都唔會阻佢。
《拉闊足球場》下次舉行日期：17/07
想參加？即上 http://soccer.atnext.com/jp/soccer
節目重溫： http://sport.appledaily.com
