教兒育女，張堅庭和太太楊諾思着重以身作則，他們重點培育三名子女做個對社會有貢獻、實而不華的人，向他們灌輸節儉美德。張堅庭從生活小節、衣食住行等各方面均要子女貫徹開源節流，從中教導他們理財概念，而每晚三個孩子在父母房間傾訴心事時，張堅庭更會向他們灌輸性教育知識。 撰文：比華利
一聲roll機後，在水銀燈下，無論當導演，甚至乎主持遊戲節目的張堅庭都揮灑自如，就算返回家中，他也是太太楊諾思心中的好老公，以及13歲長子張高銘、11歲二女張一諾和8歲幼子張高翔口中盛讚的好爸爸。張堅庭日前接受訪問時說：「可以做好一個家庭嘅CEO，就算當上大公司嘅CEO也沒有大問題。」
鼓勵子女講價
就憑這一點，張堅庭一直以身作則，希望培育三名子女做個對社會有貢獻的人。雖然有這個目標，但他捨棄傳統填鴨式教育，取而代之是自由發展，張堅庭說：「基本上，我哋兩公婆都係有求必應嘅父母，但當然小朋友嘅要求要合理，我會盡量畀佢哋喺自由嘅氣氛下成長。我唔期望佢哋將來做醫生或律師，學業標青，不過一定要佢哋有人生目標，起碼要對追求知識有興趣，將來要盡回饋社會嘅責任。」
對於新一代的家長都溺愛小孩，張堅庭雖有財力寵愛子女，但也培育他們自幼養成節儉美德，他說：「唔係必需品嘅嘢，我都唔會買畀佢哋，呢樣嘢我同老婆好有共識，任何一方都唔准縱容班細路。就算平時買嘢，我都會同佢哋一齊去格價，揀到啱價錢先扑槌，我又鼓勵佢哋買嘢試吓講價。」
飲茶食包打底
張堅庭更不容許子女出入貴價餐廳，他說：「我哋平日食嘢都係去茶餐廳，我又唔准佢哋浪費食物，因為世界上仲有好多窮困地方，有好多人三餐都冇溫飽，佢哋唔使憂柴憂米已經好幸福，知足先會常樂。有時飲茶，我都會教佢哋可以先點腸粉同叉燒包打底，食咗先再食其他點心，一來可以平啲，二來食腸粉同包類食物都冇咁多油，對健康都好啲。」
至於青少年都愛潮物，花費不輕，張堅庭說：「後生仔大部份都鍾意時髦名牌，但佢哋未識搵錢就唔應該亂買，不過我好體諒佢哋呢個心態，所以我會選擇性畀仔女買潮物，我會建議佢哋買H&M，一樣係名牌，不過價錢好合理。」
張堅庭在衣食住行生活上教育子女節儉，他們都非常接受，他說：「記得有一次全家五口去澳門玩，我哋租咗間酒店房，大仔要求加床，不過佢打去服務台一問，要額外加500蚊一晚，佢立即自覺收線，我都覺得安慰。大仔平時去玩，出入都唔捨得搭的士。」
捨得花錢買書
平時省吃儉用，但若子女們要到書店瘋狂shopping，張堅庭即願意大破慳囊，他說：「我最捨得係買書畀小朋友睇，我好鼓勵佢哋多閱讀，可以訓練思考、寫作同組織能力。」
身為一家之主的張堅庭，他主張父母待子女關係如朋友，他說：「我兩公婆同幾個細路，直到𠵱家為止，佢哋三個每晚都會入嚟我同老婆間房，同我哋一齊傾心事，分享所見所聞，我哋都會畀啲中肯意見佢哋，當中又會滲入一啲性教育知識，要佢哋學識保護自己。」
面對三名子女，如何可以做到公平不偏私？張堅庭說：「我會一視同仁，始終佢哋三個年紀都有差距，所以需要嘅嘢都唔同，除咗必需品要買足三份之外，其他會因應唔同需要買嘢畀佢哋，暫時都冇人投訴我偏心。」
感激太太尊重
張堅庭自93年迎娶楊諾思後，至今長達15年的婚姻，兩夫妻恩愛如昔，他慶幸彼此無論思想、信仰，甚至教育子女的方向都一致，他說：「基本上我哋兩公婆好有共識，交換一個眼神都明白到大家嘅心意，好多謝太太一直好尊重我嘅意見，兩夫妻肯付出努力，先至可以建立出幸福又和諧嘅家庭。」
子女心聲：一人有一個夢想
身為導演的張堅庭，並不會強迫三名子女繼承衣缽，他和太太只希望子女們可以自由發展，不會祈求望子成龍，望女成鳳。
幼子張高翔自06年與父親張堅庭看完世界盃後，立即激發起他的踢波狂熱，他最近還參加了香港巴塞足球學校（FCBESCOLAHONGKONG）的訓練課程，每周都會進行密集式集訓，問到將來的志願可會像爸爸一樣當導演？他日前搖搖頭說：「我喜歡踢足球。」萬人迷球星碧咸（DavidBeckham）可是其偶像？高翔說：「我唔鍾意，我鍾意卡卡，佢踢得好好，我好希望踢到好似佢咁叻。」他口中所言的是效力AC米蘭的巴西球員卡卡。
渴望當導演
二女張一諾，動如脫兔，靜若處子，她熱愛打網球，對唱歌也有濃厚興趣，尤其喜愛唱英文歌，問到將來可考慮在娛樂圈發展？她說：「我都鍾意，唱歌同做戲，我都有興趣。」那會在鏡頭前害羞嗎？她說：「唔怕㗎。」
至於長子張高銘卻對執導演筒充滿興趣，他不時與爸爸深入研究，張堅庭也大讚兒子有天份，不過他要求兒子必要先學好中文，高銘說：「自細爹哋就畀好多小說我睇，又會同我討論劇本，我好有興趣做導演，不過爹哋話我要先學好中文，最低程度要識睇劇本，我會喺呢方面努力㗎啦。」
必須讀大學
聽到三名子女都各有夢想，也承諾向着這個目標努力進發，張堅庭深感安慰：「我會因材施教，始終佢哋仲係好細個，今日嘅理想，長大後可能已經唔同咗，但最重要係已享受過當中嘅學習過程，已經有得着。無論佢哋將來選擇入邊行，我都要求佢哋最基本要讀完大學課程。」
育兒心得：電腦公用 嚴守家規
張堅庭極反對時下青少年沉迷電腦虛擬世界，所以一家人使用電腦時必要嚴守規條。雖然平時他給予子女很大自由度，但一使用電腦，就必要遵守家規。
上網搵譜學結他
張堅庭說：「我哋屋企，冇人係擁有私人電腦，只係買咗一部放喺客廳公用，仲唔准加密碼，唔可以有秘密。因為電腦嘅虛擬世界對青少年有好多壞影響，我容許佢哋上網，但嚴禁沉迷，一人一日最多玩半小時，過時就要同我申請。」張堅庭認為過長時間使用電腦，對小朋友的眼睛也有不良影響。
不過，張堅庭卻十分鼓勵孩子們透過YouTube上網學習，他說：「大仔都係透過YouTube學識彈結他，佢上網搵譜同學習技巧，好快就學識。」
子女名字大有來頭
俗語有云：「唔怕生壞命，最怕改壞名。」張堅庭三名子女的名字，都經過深思熟慮才改，又或得名家指點，特別有意思。
長子高銘——自我警惕
張堅庭說：「大仔個中文名係我改嘅，選擇用個銘字，佢係刻喺器物或石碑上，警惕自己或讚頌他人嘅文字嘅意思，好似座右銘。」
二女一諾——一諾千金
張堅庭說：「囡囡嘅中文名係金庸同佢起，有一諾千金嘅意思，我一聽就好鍾意。」
幼子高翔——展翅高飛
張堅庭說：「細仔中文名係國學大師饒宗頤同佢改嘅，有展翅高飛嘅含意，希望佢嘅將來都會好似個名咁。」
