超蓮陪母買Nokia<br>馮仁昭四圍超:戴夢夢搶購iPhone3G展床姿 - 馮仁昭

超蓮陪母買Nokia
馮仁昭四圍超:戴夢夢搶購iPhone3G展床姿 - 馮仁昭

成為全球熱門話題嘅蘋果iPhone3G噚日終於喺香港面世,戴夢夢做第一批「潮女」一早訂貨,噚日佢去尖沙嘴嘅電訊客戶服務部拎電話,排隊等足個幾鐘都冇怨言。今次iPhone3G分別推出黑白兩色,夢夢心大心細揀唔定,最後決定買白色16GB款式,即買即用,佢話:「好似話𠵱家炒價去到1萬7千蚊,我就好似拎住咁多錢出街。」

一早訂貨嘅夢夢噚日去尖沙嘴拎電話,排足個幾鐘都毫無怨言。

超蓮幫手揀手機時好入神,連露出黑色bra帶都唔知。

張敬軒中籤

夢夢最想玩視像功能,佢話:「平時臨瞓前同朋友玩,佢哋想睇我冇化妝嘅樣,知我坐喺床又叫我畀多啲嘢佢睇。而且呢部機可以聽歌同上網,有時開工就方便我練歌或者查資訊。」
張敬軒都有訂iPhone3G,佢話:「今朝佢哋通知我抽籤抽到,我都好期待,因為屋企有6個item係蘋果嘅,其中4部係電腦,新款本地網絡又支援到,應該唔會好似舊版收得咁差。」曾志偉噚晚出席活動時話會託朋友喺外國買iPhone3G,問佢係咪怕俾電訊公司啲約綁死?志偉抵死話:「我哋呢啲已經俾TVB綁死,仲俾其他嘢綁?」
另外,賭王三太同佢個女超蓮噚日4點幾就喺ifc出現,見佢哋入咗間電訊公司買手提電話,不過佢哋唔係買iPhone3G,超蓮幫媽咪揀咗部Nokia嘅6220手提電話,只見超蓮幫手揀電話時揀到好入神,連露出黑色bra帶都唔知,問到超蓮係咪送電話畀媽咪?佢話:「唔係,媽咪電話個螢幕壞咗,所以先換部新電話。」最後由三太碌卡畀錢,盛惠3,580蚊。

超蓮陪三太買電話,最終揀咗Nokia呢個牌子,但就由媽咪自己畀番錢。