小妹呢排上去討論區同啲網友吹水，其中一個熱門話題就係出前一丁價錢創新高，要賣$4一包。有啲網友話會忍住唔食，有啲仲話買定嚟炒，有啲話一早轉食公仔麵、媽咪麵。小妹上星期喺超市買都係$3包，聽到啲網民咁講，噚日咪去巡咗三間超市格價，點知發現出前一丁又貴咗，最貴係$4.4一包，換之言，短短一個星期，就加咗三成，真係得人驚。
三間超市最貴係華潤萬家，$4.4一包，買五包特價$18.5（圖），平均一包$3.7；而百佳同惠康原價分別賣$4同$4.4，𠵱家特價，買一包都係$3.7，唔使好似華潤萬家咁要買五包。至於公仔麵就比出前一丁平40%，每包賣$2.6。
港九罐頭洋食伙食行商會副監事長李廣林話，$4.4一包出前一丁真係創咗新高，𠵱家啲麵粉加得好犀利，啲麵冇法子唔加價。廣林叔教路，如果消費者要求唔高，可以買啲泰國、越南嚟嘅雜麵，會比名牌麵平好多，「仲有，買雜麵喺雜貨店買，再比超市買平好多㖭。」
聽到出前一丁賣$4.4，中文大學市場學理學碩士課程主任冼日明都嚇咗一跳，佢話反映咗通脹越演越烈，最受影響係低下階層，「佢哋平日有時連飯都唔捨得食，淨係食麵就當一餐，但𠵱家四個幾一個麵，真係唔平。」
咁有乜解救辦法？冼日明感慨話：「我哋（港元）係同美金掛鈎，美金咁弱，啲嘢只會越嚟越貴，政府唔做嘢，我哋啲小市民惟有食少包麵。」
電郵：mailto:[email protected]
逢周六、周日刊出