煲呔揀無可揀，始終要揀個公務員做問責局長，公務員圈子同私人機構一樣，都好講究馬房系統，現時官場上下唔少煲呔馬房人馬，不過有人指佢馬房入面嘅馬仔質素麻麻，投資推廣署署長盧維思係其一，曾任特首私人秘書丁葉燕薇，據講因辦事經常蝦碌，結果冇得留低，俾煲呔調走佢兼燉冬菇。
雖然前車可鑑，不過煲呔都冇改過，連累佢民望大插水嘅特首辦主任陳德霖，就算搞出副局長同政治助理風波咁大件事，煲呔至今仍然撐到佢「行」，有高官同八方講，陳德霖喺事件中主持大局，由搵人以至公佈安排都由佢一手策劃，其他官員冇可能亦冇機會插手，其他問責局長對此都唔多順氣，因為部份獲局長提名嘅人選都落空，而陳德霖提名嗰啲就中晒。
有官員話，陳德霖無疑十幾年前做過政務官，係叻人一名，可惜近年時代唔同咗，自把自為一定出事，有人更指陳德霖向外認衰，實際上一直認為自己冇錯，近期同其他官員開會時，仍擺出強硬姿態，以為口硬就鎮得住場，其他人看在眼裏，得啖笑咁話，事實上都冇辦法，因為阿Sir繼續撐佢，冇人奈得佢何。