iphone3G熱潮席捲全球，潮人、IT人無不以第一時間到手為榮，香港IT界代表單仲偕，前晚收到兩部，噚日第一時間攞嚟用，拎到立法會「晒」機，應該係首個議員用iphone3G。
讚機身纖薄手感好
單雞話自己係VIP客戶，所以獲預留兩部iphone3G手機，一部俾太太用，一部送畀細仔，因細仔留學美國，所以暫由老竇保管「借用」。由於新機前晚先到手，單雞仍未熟悉操作，佢讚新機輕巧纖薄，手感幾好。
現任IT界議員佔先機，兩個準備出選IT界人士，就冇咁知機嘞。譚偉豪話暫未考慮轉用iphone3G，因為佢公司權智國際有出產手機，身為老闆，梗係用自家Xplore出品啦，佢日常都有用BlackBerry。
莫乃光指iphone3G幾得意，不過暫未有意思換機，𠵱家常用一部PalmCentro。呢款機喺PDA電話之中都算冷門，佢話唔用BlackBerry，因為唔想透過電訊公司伺服器先收到電郵。譚偉豪今日正式宣佈參選，光明正大做競選活動，莫乃光則話日內會有宣佈。