食完外食內，心肝脾肺腎、骨頭、雞子……講到最好味一定係成呎長嘅雞腸。家陣活雞唔留過夜，雞腸越變越寶，靠師傅妙手一雙，鑊鏟一兜，下欄貨一樣可以變天下美味，唔識食，係你損失。
記者：洪偉順
攝影：林栢鈞
模特兒：Aiyi@Stages
Model：Koby
好腸難求
「𠵱家搵雞腸，行勻四、五間雞檔都未必買到三斤，慘呀，」又唔係甚麼山珍海錯，「自己友火鍋」老闆翟先生講到雞腸天上有地下無，個表情都幾好笑，「我可以保證，我每日都提供到三款雞內臟菜式，你落得Order，我就煮得畀你食。」睇餐牌，雞心、肝、腎等菜式有齊，仲有埋雞子、軟骨，嗜雞一族如我發大達。
「我有個客好誇張，最高紀錄可以一星期食足七日雞腸。」無計，雞腸難求，油膏豐富口感爽脆，唔使點調味已經口水流，驚雞腸肥膩？唔理咯，食咗至算啦。自己友火鍋（地址：筲箕灣筲箕灣道117-119號H舖/81058050）
三色炒雞雜$58
雞心、雞肝同雞腎發揮內臟鮮味，青黃紅椒雖然係配角，但三椒爽脆內臟軟腍，咁先平衡到口感。
椒鹽雞軟骨$48/6串
用雞髀關節軟骨做串燒，軟骨有油份，一燒啲油咇晒出嚟，咬落硬中帶軟，香酥有嚼勁，送啤酒一流。
白灼雞腸$48
雞腸肥膏本身微鹹，鹽都唔使加兩粒，齋白灼最鮮味，師傅拿揑得好，唔會灼到過火變到又韌又柴皮，入口好爽脆。
米酒煮雞子$58
雞子真係有壯陽功效？唔知，我淨係知用杞子加米酒炮製雞子，口感滑嘟嘟唔會太過粉，墊底嘅粉絲吸收晒湯味，超鮮甜，熱辣辣放雞子入口，最Enjoy一咬湯汁咇番出嚟嗰下快感。
翟生先（右）同拍檔年紀輕輕，但對食物的質素要求高。
五十年代燒味
「以前金錢雞周街有得賣，堪稱五十年代嘅燒味，」「鳳城酒家」師傅蝦哥話：「六十年代興起燒味，呢味用雞肝做嘅菜式開始沒落，好多老一輩嘅人想食都食唔番，𠵱家好少地方有得食咯。」
五十年代，雞內臟呢啲下欄貨要搵唔難，用雞內臟做嘅菜式多不勝數，「雞內臟肥膩？嗰陣時窮，人人只會驚食唔飽，對肥油無咁強抗拒意識。」時代變咯，舊菜式難逃淘汰厄運，想食，真係要趁快呀。（旺角彌敦道749號1樓至2樓/23815261）
鳳肝金錢雞$138
鳳肝，即雞肝；金錢，講嘅係賣相，串起雞肝放入火爐，形狀似古代一串串銅錢。肥豬肉放底，瘦肉放中間，頂放雞肝，加椰汁醃製，肥豬肉要先放入砂糖堆過夜，製法複雜，入口唔肥膩。須兩日前預訂。
紫蘿骨香雞$98
雞背骨斬件成雞排骨炸至香脆，加子薑同鮮菠蘿炒埋一碟，排骨肉好鮮嫩，酸甜開胃。
