立法會收爐前連續五日開馬拉松大會，議員、記者苦不堪言，陳太噚日請食蛋撻慰勞記者，不過唔係幫襯肥彭至愛嘅泰昌，而係蛋撻王，同肥彭口味唔同。
據立法會秘書處紀錄，去年底上任嘅陳太，任內共提出五項質詢，陳太話卸任後會全力幫屬意候選人助選，以及推動民間策發會工作，佢澄清唔係只係為25至45歲候選人站台，差幾年都得。雖然陳太咁講，但八方勸甘乃威都係咪奢望好啲。
陳太上任後曾俾德成局長針對，事隔幾個月，佢似乎冇放心上，噚日話日前政府《種族歧視條例》修訂被否決，係任內最開心一役，真係天有眼。陳太又讚除咗泛民，工聯會嫻姐都好勤力議政，八方翻查紀錄，發現詹培忠過去一年冇向政府提出質詢，中指黃、黃容根、小霍則各提過一項質詢，呂明華、陳鑑林、梁劉柔芬、劉健儀、張宇人、鄺志堅等各提兩項，馮檢基、劉江華係「問題議員」，分別提出43項質詢，卿姐有37項，屈居其後。