由瑞士巴素利回巢至日本鹿島鹿角嘅中田浩二，日前與拍拖4年嘅明星女友加藤愛分手，震動整個日本藝能界及球壇。
中田浩二同加藤愛7年前透過朋友認識，並展開地下情，由於中田05年遠赴歐洲搵食，先後效力馬賽及巴素利，兩人聚少離多，故感情一直未被發現。
直至去年7月，兩人感情正式公開，加藤愛更在記者會發表「愛的宣言」，有狗仔隊拍得兩人與加藤愛母親在東京銀座逛街。由於日本文化之中，情侶一般甚少「見家長」，故所有人都認為「中加戀」打風都打唔甩，更有傳今年秋天會拉埋天窗。
加藤愛事業為重
加藤愛於日本紅透半邊天、電視劇、廣告、雜誌都見到佢。愛情大過天嘅加藤愛，近年更為咗拍拖而減少工作。不過，當中田5月回歸後，兩人反而最終決定分手。據加藤愛友人透露，其實大家仍深愛對方，只因兩人決定以事業為重，至逼不得已作出這個決定。
事實上，一心染指3大錦標嘅鹿島鹿角，對剛加盟嘅中田浩二寄望甚殷；加上佢希望重返國家隊，出席9月展開嘅世界盃外圍賽，令目前膝部受傷嘅中田承受極大壓力，畢竟佢已經係29歲，仲希望趁呢段黃金時間爭取更大成就。
至於25歲嘅加藤愛，同樣處於事業搏殺期，女演員青春有限，婚事只會拖垮其銀色旅途，兩人決定以事業為重，作為球迷及影迷，只能祝福佢哋前程似錦。
作者簡介：2001年開始擔任足球賽事自由撰稿人，曾親身採訪各項大賽，包括世界盃、亞洲盃及非洲國家盃等。現為香港賽馬會足智彩網頁撰寫球評分析。