26歲的05年港姐冠軍葉翠翠，自入行後竟締造了一個又一個的傳奇。神奇變靚、離奇發育都濕濕碎，過去500日由窮港姐化身股神，自稱靠炒股豪掃總值3,000萬的兩個賽西湖單位才叫人驚訝，批評之聲此起彼落。前日翠翠在將軍澳接受本報專訪時，大爆一年前仍受盡白眼，被人視作隱形、遭姐仔呼喝，睇死她紅不起，如今她有錢揸手，變得豪氣又自信，反擊死敵風水輪流轉：「你睇唔起我就錯啦，我一定會記得，絕對唔會輸畀你！」
攝影：林德雄 協力：黎敏茵
服裝：RebeccaTaylor
-發奮篇「風水係會輪流轉嘅」-
葉翠翠自稱瞓身炒股，又要兼顧無綫拍劇、主持工作及商場騷。她日夜狂做，現有本事坐擁3,000萬豪宅固然巴閉，她直認在事業上拼搏，是因為一直被人看扁，覺得她是不會紅、不起眼的小角色。
翠翠說：「啲人覺得我唔起眼，但我亦都同自己講，天生我才必有用。今日你可以睇小我，但你將來一定唔會睇小我，呢啲係我一直放喺心裏邊嘅說話。人越嚟越大，會變嘅，三年前專訪我會講『我打份工咪OK囉，都唔諗住入行嘅』，但當行到條路某一段時，性格同思想會改變，因為啲人太叻，你唔叻人哋就會知你諗乜，你一定要叻過佢。」
「好多睇唔起嘅眼光」
雖然身為港姐冠軍，但之前翠翠都只是擔當配角，直至近日播出的《疑情別戀》中才佔較多戲份。拍劇沒地位，受的白眼特別多，翠翠說：「公司有啲人嘅態度唔係咁好，人哋眼中覺得你搵唔到錢、唔夠紅，待遇會冇咁好。食飯迎面行過見到你都唔會叫你，好多睇唔起嘅眼光，但自己要求存，要同自己講今日你睇唔起我你就錯啦，我一定會記得。」
問翠翠曾否被其他姐仔欺侮，她連隨說：「有，同你講啲嘢好冇禮貌：『喂、喂、喂！你呀！』嗰刻會好難受，但唔緊要，我更加肯定同自己講，我一定唔會輸畀你！條路好長，我一定唔會跑得慢過你、一定要快過你！將來嘅事大家都唔知，靜觀其變就知將來發生乜事。我唔急於一時，因為呢個世界，風水係絕對會輪流轉嘅，我唔係咒人哋當紅嘅，但今日你當紅，日後我都有機會；或者就算我唔係做電視當紅，但我相信我嘅一生，會喺第二度當紅，絕對唔會輸畀你！」
與李逸朗相戀，結果情傷收場，也令翠翠成長，明白女人要擁有自己的事業，「每一件事嘅發生，我都會拆到毛髮咁細搵答案，我錯喺邊？永遠都唔要再錯！講以前嘅李逸朗，點解會搞到咁負面呢？自己待人處事點解咁多問題？我用最短嘅時間成長，你唔成長人哋就會蝦你。」
「你紅人哋先會尊重」
是環境使然抑或崇尚拜金主義，翠翠的狀況只有她最清楚，但她變是一定的了，「呢個世界最緊要係你有嘢揸手，譬如有錢，出嚟社會有錢就有地位，呢行你一定要紅，人哋先會尊重你，我深深明白呢個道理，但你要用好多方法去達到嗰件事。」
自從傳出翠翠買樓的消息後，外界批評多多，但她懶理，照樣會花10萬裝修、打算買跑車，她說：「我唔會因為你嘅說話而唔買，呢個係我嘅世界，如果第日我拍拖，你又話我搵老細，咁我呢世唔使拍拖、唔使嫁人啦喎？根本就係你做乜都會話你，就係鍾意話你，吹咩？」吳文忻和袁彌明都曾寸翠翠，質疑她賺錢來源，翠翠一派淡然：「我唔會理你咁多，佢講乜我唔使知，唔會回應。你有權利發表意見，我有權利做我嘅事。」
翠翠昨日出席活動時，提到袁彌明於周刊專欄嘲諷當年翠翠和李逸朗拍拖是追求愛情，現則棄愛情求麵包，翠翠只說：「佢都幾清楚，唔通瞓喺我隔籬？我唔介懷，亦冇時間理。𠵱家屋企樓下每日都有狗仔隊等，搞到我買唔到傢俬，買大床實俾人話，唔通買張三呎床表清白咩！真係好煩。」
「唔係有錢就買到我」
曾否被人提出照顧要求或請翠翠出席富豪飯局？她即說：「冇，亦都唔贊同呢啲嘢，人哋嘅嘢我唔批評，但我知一行呢條路，一世都行呢條路，我唔想囉。我希望搵個好老公，結婚生仔，而唔係畀人包，我完全唔接受，多多錢都唔會。我自己都搵到，呢嚿錢又唔係10億，但我將來嘅日子比起呢10億更緊要，將來嘅老公都應該照顧到我，咁我點解要用自己嘅名譽去換一千幾百萬？係咪要賣身呢？唔係有錢就買到我㗎。」
-發迹篇「你夠膽都可以做到」-
一口氣買下兩個總值3,000萬的賽西湖大屋，被喻為港姐股神的葉翠翠豪氣不嘢少，她自稱炒股炒到發大達，令不少人既妒且羨，她則說：「我唔係賺到3,000萬，係賺到首期買樓啫，買股票只要你夠膽都可以做到。」
靠中國人壽食糊
葉翠翠堅稱一年多前經父母啓示下炒股，去年3、4月她先買中國人壽（2628），再買其他仙股，炒即日鮮，這樣就由六位數變成七位數，相當神奇，她說：「舊年你瞌埋眼，求其買一隻都升，阿爸阿媽都話中國人壽呢啲大藍籌唔會好似仙股咁變到零，我就將大部份身家擺落去，咁啱喺三萬一千點放晒，一百蚊變成二百蚊。
「有心玩股票要睇書、上網、睇業績、聽收音機；唔好高位追、忍得住、夠冷靜，睇埋你好唔好彩。係要話全港市民都蝕，你賺？冇可能！你做唔到嘅嘢，咪覺得冇可能囉！你做唔到並唔係人哋都做唔到，劉翔跨欄咁勁，點解我唔得呀？唔通話佢出貓、偷步喇喎？呢個係公平賽事，你花幾多心思時間去做，就得幾多成果效益。」
娛樂資料庫：港姐老友紛變死敵
自去年葉翠翠發力瞓身工作後，收入也隨之大增，由窮港姐搖身變股神，但與其他女星的不和傳聞也因此增加。
死敵：袁彌明
不和事件：當年與葉翠翠同屆兼同房，07年6月在blog發表文章「為何港姐/女明星總是給人貪慕虛榮的感覺？」，似在揶揄被踢爆出席富豪飯局的翠翠。今年6月寸她：「假波就唔好拎出嚟啦，我相信富豪都唔鍾意打假波！」其後又表示翠翠的炒股買樓之說是敷衍傳媒同公眾。
死敵：陸詩韻
不和事件：今年4月被指與葉翠翠曾爭主持《事不關己》，其後雖然表面若無其事，但就暗寸翠翠：「佢好努力，好多人話佢靚咗，可能係識打扮啦……我唔介意人哋整，不過我都幾滿意我身形，所以唔使整都夠用。」近日又單打她說：「我屋企有錢，同埋唔需要花邊新聞。」
死敵：吳文忻
不和事件：日前被問及對葉翠翠炒股買樓一事時，語帶嘲諷說：「佢咁犀利，陸叔（陳永陸）都要行開，好叻囉，佢係港姐股神，唔係師奶股神。」被問到會否羨慕翠翠時即說：「我點炒都冇咁犀利，我唔係羨慕佢，呢啲錢咁難搵，我就搵唔到，我揼石仔就得。」
死敵：陳法拉
不和事件：在《溏心風暴》中，翠翠只屬客串性質，反而陳法拉憑劇上位，可惜走紅後相當錫身，其後不時與翠翠於泳衣騷同場，結果經常被性感比堅尼上陣晒身材的翠翠搶鏡。
資料來源：《蘋果》資料室
發育傳奇
05年葉翠翠參選港姐時，已被指在當model期間曾割雙眼皮、隆鼻及打Botox針瘦面，但當事人一一否認，並聲稱只是化妝效果。翌年10月則被雜誌指她到港島區美容院，注射了一種名為透明質酸的液體，將鼻樑加高。至07年狂接泳衣騷時，則被指胸部離奇升cup，由32A谷至34D，身材變得相當有睇頭。
冠軍股神：人生起跌恍如股市
堅稱在股海乘風破浪賺大錢的葉翠翠，其人生經歷也恍如股市波動一樣大起大落，既當選港姐經歷人生的牛市時期，又因與李逸朗拍拖而踩入熊市階段，至近日忽然掃兩豪宅，行情急升破頂，充滿傳奇。
04年6月：在學期間擔任模特兒，更曾參加第16屆世界模特兒小姐大賽，獲得季軍。
05年7月：在一片抨擊其整容聲音中，擊倒港姐大熱袁彌明，當選成為港姐冠軍。
06年11月：與李逸朗秘密拍拖九個月，更共賦同居，事業因此大受影響，最後二人因性格不合分手。
07年7月：報道指葉翠翠患有腎病的母親病情急轉直下，翠翠不惜狂接泳衣騷搵手術錢。
08年5月：被爆料指5月時以個人名義連掃兩個北角賽西湖大廈單位，總值超過3,000萬，由窮港姐變身股神。
資料來源：《蘋果》資料室
