女人天生鍾意講嘢，無論乜事都會講餐飽，所以小妹平時就煲埋唔少電話粥，搞到每個月嘅手機電話費爆晒燈，所以近排都打算喺屋企裝番條固網電話線，但就唔知買邊款電話好，即刻打畀消委會老友問問意見。
老友話，揀室內無線電話最重要嘅係睇佢有冇貼到電訊管理局認可標籤，如果冇嘅，可能唔係用原裝配件，有乜事都未必有原廠保養同維修。有啲固網電話兼容VoIP，毋須經電腦上網都可以利用寬頻網絡通話。即係話，電腦用戶只需上網加埋耳筒同咪，就可以用到Skype打長途，收費仲比直撥IDD服務平，玩埋MSN同GoogleTalk做視像通話都得。如果對方都係Skype嘅登記用戶，通話仲完全免費！
佢話，近排消委會都做咗個固網電話測試，DECT制式嘅電話，評分最高首三位都係樂聲牌，型號係KX-TG7200HKS、KX-TGA717ES、KX-TG1100HKS，其中KX-TGA717ES有特殊骨導聲音設計，適合耳朵唔靈光嘅老人家使用。DECT同VoLP兼容嘅電話，表現最好嘅係NETGEARSPH200D，效用同使用方便程度都唔錯，仲可以儲存500個電話號碼。
電郵：mailto:[email protected]
逢周六、周日刊出