聽完投資Ｍ講教師Ｐ之追租追數故事，覺得追數公司甚有威力，於是問追數王點解，追數生意是否隨住經濟興旺而下跌。追數王話：「非也，你哋睇報紙新聞講淋油，噴漆，以為追數公司係奸嘅。其實呢行有不同派別，欠賭債、高利貸、信用卡、私人貸款等等，各有不同，我間公司專門代金融機構追數，如果追數時俾對方投訴，警局搵完我哋，金管局就會搵金融機構，跟住我哋就好容易玩完出局。我哋追數嘅最大武器就係（一）打工仔唔敢俾人事部及老闆知道佢哋欠數不還、（二）金融機構共享個人信貸紀錄（personalcredithistory），如有人欠金融機構債項，拖欠不還嘅話，佢個名會在紀錄中出現。以後去邊間金融機構借錢都有麻煩。我哋追白領階級清還卡數，一講credithistory佢哋就乖乖還錢嘅嘞，最多搵親戚集資都還咗銀行嘅陳年舊債先。現在經濟好，打工仔易搵工，有薪水加，搵一啲打工仔清還九六年欠下嘅錢，並不困難，最大困難反而係去邊度搵到佢哋。」至於點樣尋人，係追數王嘅商業秘密，唔講得，左丁山亦費事問。
追數王擅於追白領階級欠數，所用者乃係應用心理學，白領階級一般係怕事之人，還得起錢嘅話，唔會有心情或意志同金融機構及追數公司糾纏。一啲朋友笑追數王：「你識得咁多蠱惑招，不如做埋偵探。」追數王聽見，又有古仔講。話說某私家偵探收咗一位太太金錢委託，跟蹤佢老公X到深圳東莞打所謂高爾夫球，查探有冇包二奶。偵探做咗狗仔隊幾個星期，影咗唔少相，打電話搵X先生見面，畀相片佢睇：「嗱，我唔想破壞你家庭幸福，咁多靚女相，肉緊相，賣晒畀你，唔畀你老婆，保證以後唔會勒索你，我有江湖道義嘅。」X先生畀咗一筆，收相片了事，以後果然冇人煩佢，同老婆關係如常，但就收斂咗，誠恐老婆再搵第二個偵探跟蹤也。偵探又拿出一批X先生在深圳東莞打波嘅照片，畀X太睇，話X先生只係間中逢場作興啫，絕無越軌行為。X太太大為放心，畀佢服務費，唔再搵人跟老公，據稱此乃三贏方案，太太放心，老公保持秘密，偵探兩面收水，贏得最多！