活雞日日清，真係驚遲啲雞會喺中國人食譜裏面消失，到時拜神唔見雞，你話幾頭痕。驚呢？驚就珍惜食雞機會啦，雞忽忽都做到美味菜式，Crossover埋蝦，搞到隻蝦都起晒雞皮，真過癮！
記者：王震遠
攝影：林栢鈞、楊錦文、周旭文
賣相有驚喜
「六本木」開業半年，裝修新淨企理，光線柔和坐得舒服。總廚曾經過日本學師，水準有保證，日式料理、活魚、串燒瓣瓣皆精。睇餐牌搵雞喫，其中一道雞皮蝦卷最估佢唔到，賣相橫睇掂睇明明係隻蝦，擺入口先知道Mix埋雞皮，好有驚喜。（尖沙嘴彌敦道74-78號文遜大廈5樓/23011024）
雞皮蝦卷$68
極具創意，要讚。鮮蝦去殼露肉，師傅好手工，用薄薄雞皮包住蝦身，大火猛燒，直至燒到雞皮同蝦身融為一體。雞皮好脆，蝦肉好鮮嫩，入口先卜一聲，之後軟腍腍，好過癮。
炸雞頸$68
雞頸由日本入口，蘸日本炸粉炸香，本身醃到入晒味，香脆到爆。正在賣相都企理埋，唔會見到一截截雞頸咁恐怖，點青芥辣汁食，十個好味。
真係唔錯，香口得嚟唔會太亁身。
燒雞頸$58
顏色配搭幾靚，一嚿雞頸一塊青椒仔串埋一串，青椒爽脆嗦嗦聲，唔使啖啖肉咁油膩，新鮮雞頸直接燒，原汁原味。
主打有機食材
「Munch」Sell健康飲食，大把有機食材，裝修簡潔亮白，坐長餐枱好闊落，牆壁掛滿油畫，天花板一幅特長油畫最有藝術氣質，我最Buy玻璃幕牆，牆外擺滿常綠植物，對開盡覽諾士佛臺景色，日頭開揚夜晚有View，有種忙裏偷閒慢慢Hea嘅感覺。（尖沙嘴諾士佛臺1號1樓/23177887）
法式巴馬火腿雞卷伴有機意粉批（香辣黑醋汁）$145
巴馬火腿包美國雞髀煎香，下墊有機意粉煎出嚟蛋餅，再笠多個大圓脆餅，賣相有啲似中式雞紮，砌到靚上碟。雞肉鮮味同巴馬火腿好Match，加埋香辣黑醋汁仲正。
有機南瓜雞球意大利飯$145
鮮南瓜做醬汁炒飯，雞胸切粒撈飯再炒多次，直至炒到入味為止。雞胸肉難得地唔嚡，嫩口有嚼勁，飯粒亁身唔會濕𣲷𣲷，有飯香。
過癮十級辣
「譚仔雲南米線」喺旺角、深水埗、大角嘴同佐敦都有分店，老闆三哥用湖南、四川同貴州辣椒做米線湯底，辣固之然，仲超級香噴噴。「你怕辣唔敢食米線，不如試吓啲雞翼吖。」死就死啦，入口，起火咁滯，係好辣，但又忍唔住啪晒成碟。（佐敦南京街5號/27768849）
湖南土匪雞翼5隻$23
齋睇面頭一粒二粒黑椒已經知道攞命，可能我唔抵得辣啦，入口好似着晒火咁，不過辣得嚟超香，雞味好濃郁。
四川麻辣雞翼
賣相似一般脆炸雞翼，食落比想像中辣幾倍，四川菜用勁多香料，香到九里遠都聞到，雞肉鮮嫩，越食越想食。
好味家常便飯
「台灣牛肉麵」主打牛肉麵，但川京小炒家常便飯都做得相當出色，師傅製作認真，用料上乘，食得出份誠意。（九龍城獅子石道40號地舖/29266018）
醉轉彎$46
雞翼雞尖連埋雞槌，煮到七成熟，熄火，浸花雕酒待凉，雞皮爽滑雞肉彈牙，酒香四溢，冰凉消暑佳品。
好滑，酒味適中，份量唔小。
貴價鳳爪
「車氏粵菜軒」係飲茶熱點，裝潢格局堂皇，唔少紅星名人都係捧場客。最出名菜式係鮑參翅肚，鮑汁×鳳爪，睇個名都知道係貴價貨，事實好味到我連汁都舐埋，照晒鏡呀。（灣仔駱克道54-62號博匯大廈4樓/25281123）
鮑汁燜雞腳$55
用大大隻日本鮑魚汁慢火燜雞腳，雞腳好似中咗化骨綿掌咁，連骨頭都軟綿綿，滑到自動跣入喉嚨，味道超香濃。
秘製醬料取勝
「夠疆美食」黃師傅話：「正宗新疆風味串燒，絕對唔係炭燒乜炭燒物求其加啲沙嗲汁咁行貨。」問有何秘製醬料，師傅話商業秘密唔答。炭燒雞屁股，原來好受街坊歡迎，師傅日日做到無停手。（大角嘴中匯道30B地舖）
串燒雞總督每串$8
雞總督，即雞屁股，台灣人叫七里香，好多人聽到唔敢食，黃師傅洗到亁亁淨淨，入口一啲都唔臊，入口有油但唔Heavy，唔食走寶。
