中國稀土（769）呢家環保國策受惠股，預期PE得單位數，同業中最平，股價仲挨喺1年低位，抵買。稀土主打嘅產品之一，係生產節能燈嘅螢光產品。近幾年，包括中國在內，全球各地都着重環保意識，單係07年度（12月底止），包括螢光材料在內嘅稀土項目，溢利就大升咗60%到2.26億銀。稀土食正環保國策，繼續長搵長有。好保守計數，撇除滙兌收益嘅08年度實際純利，係咁意增長20%，到3億銀，預期PE都係得7.2倍。
又呢期獲券商強烈推介嘅近磅股包鋼稀土（滬：600111），預期PE20倍樓上，至於同類股嘅平均預期PE，講緊起碼雙位數，稀土最抵買。就以稀土08年度10倍PE做目標，稀土現價（1.56元）講緊要升37%到2.14元，集團要追上好似包鋼稀土預期PE水位，講緊要升1.7倍。
錦興殘爆博翻半番
錦興（275）跌到落近5年低位，現價0.116元，相對最新NAV0.64元，折讓82%，現價係貼近NAV兩折有售，三個字：「殘到爆！」再保守到唔保守咁計數，錦興上年9月底，長、短期投資合共20.6億銀。呢期個市波動都爆，就當呢筆數一筆勾銷，錦興NAV仍然上到0.36元，折讓講緊高達67.8%，仍然吸引到爆。繼續放長線，兼以呢個好保守嘅NAV計數，錦興P/B上番0.5倍，係講緊要翻半番到0.18元。