夏日已至，雨天卻從未歇止！暑假來臨，難得一家大細夾到兩日假，但大陸雨水下得比香港更狠，未出發已覺沒意思！忽發奇想，與其被雨淋，不如自己先濕身！決定搜羅抵玩好玩濕身團，先有執本屆港姐口水尾去海泉灣玩刺激機動遊戲、玩至Hit長隆水上樂園兼去埋驚險夢幻水城。今年夏日，唔Wet唔心息！
記者：馮冠芝
海泉灣：溫泉‧激流‧水上Show
提及珠海海泉灣，第一時間想起浸溫泉！直至睇見今屆港姐拍攝外景，佢哋除咗浸溫泉，仲有得玩刺激機動遊戲，加上海泉灣神秘島只限暑期開放的特備節目「夜間夢幻Show」，難免心動！旅行團包這場「加勒比海濱燒烤狂歡夜」門票，讓人邊在泳池戲水邊看泳池旁舞台表演，周六、日更有煙花激光表演。團費包埋燒烤自助餐，炭燒豬牛雞等，絕不失禮！住宿海泉灣內維景大酒店，暑期團費只需$699，就可選擇浸溫泉、玩濕身激流機動遊戲、或在水上看Show三款勁Wet項目，今次唔濕身唔得啦！
珠海海泉灣、神秘島【加勒比海濱燒烤狂歡夜】2天團
抵玩度：★★★囗
原因：團費包狂歡夜入場票，海洋溫泉浸溫泉卻需自費（成人約$177、小童約$92），加埋碼頭費$31、導遊費$100、保險$35，埋單就要千多元，不過住海泉灣維景大酒店，方便舒適就腳，都算抵啦！
濕身度：★★★★★
特別留意：此團主攻海泉灣，除卻四個購物點後，就只有第二日的孫中山故居紀念館算係景點！對好動港人而言，不如第一日喺海泉灣玩到盡，第二日留喺靚酒店Hea吓好過！
團號：BBQ02-SPC
團費：成人$699（周日至四出發）、$839（周五、六出發）；小童（12歲以下）$499
查詢：康泰旅行社（21088888）
長隆水上樂園：再戰大喇叭
又係長隆水上樂園？係，或者你上年已去過，但今年4月第2期開幕，新開的「巨獸碗」狂歡度絕對跟「大喇叭」有得比，心思思再享受離心力與水花交織的感覺？長隆水上樂園絕對值得翻叮，不過團種大多孖住香江野生世界、馬戲「森林密碼」，咁快又再去似乎有點膩。終讓我發現有團可單去長隆水上樂園，又添上新意，去蔡瀾嘆名菜時去過的海島漁村食海鮮、欣賞過萬隻動漫模型的動漫鮮花港！最緊要係唔使去孖公仔行程，團費立刻平一截，可再戰大喇叭，一圓濕身夢，爽！
長隆水上樂園、海島漁家宴美食玩樂2天團
抵玩度：★★★★
原因：團費算得上是全包！又確保第2日可於長隆水上樂園達5小時，玩足半Day，好抵玩。
濕身度：★★★★★
特別留意：此團能入住全新鼎龍國際酒店，又包埋酒店自助晚餐，讓人吃個飽！購物點只有3個！但就要喺羅湖解散，比較麻煩。
團號：ZPYR02
團費：成人$549；小童（12歲之以下）$449、離境稅$35
查詢：美麗華旅遊（82002299）
海陸空夢幻水城
珠海夢幻水城雖不及長隆新，但夢幻水城水上玩意都絕對唔嘢少，8層樓高，呈70度的高速水上滑梯，可說是水上笨豬跳！濕過身後，又可以在10層樓高玩高空吊索，海空感覺都試過，再帶你回陸地的四季果園摘時令水果，$598包你海陸空「驚」歷，值得一試。
珠海夢幻水城、四季果園2天團
抵玩度：★★★★★
原因：團費包晒！無購物點最吸引！
濕身度：★★★★
特別留意：另設民族歌舞Show、奇趣釣蝦場，每人包一隻鹽焗蝦，濕身之餘又玩又食又拎！
團號：CWWD02SD
團費：成人$598（周日至四出發）、$678（周五出發）、$718（周六出發）；小童（12歲以下）$508-$588
查詢：新華旅遊（27222888）