投資Ｍ打電話嚟講：「喂，睇完你篇『有樓賣樓』，不妨話聲畀你聽，我已經賣咗嘉亨灣，留番貝沙灣。地產W未必啱得晒，但未睇你個專欄之前，已經賣緊嘉亨灣，叫價八百幾，但冇承接，卒之以七百幾賣咗，揸咗四年，扣清交易費用，算係平手離場啦。但貝沙灣嗰層，租金幾好，有租客同我供樓，一於長揸。」
買樓投資之人要識得轉膊，投資Ｍ乃係老手，見市道麻麻，立即割價求售，收番幾百萬元，用嚟減債，減低負債比率，令自己立於不敗之地先，最多等到市道明顯轉好，先再入市追貨。有租收梗係好啦，最怕有時碰上租霸，好人業主就激氣之餘，仲驚俾人鬧番轉頭㖭。
投資Ｍ位老友教師Ｐ在中產屋邨一向有兩個車位，以前有兩架車，自己揸一部去港島返工，老婆揸一部去新界教書。今年年初老婆覺得有工作壓力，驚住學校縮班被殺，因收生數目屬於魚生粥僅僅熟嗰類吖嘛，於是賣走一部車，將個車位經地產舖租出去，月租千五。點知收咗兩個月租之後，租客一路唔交租，打電話追租，租客一味話自己係做會計嘅，成日在大陸查數，唔得閒寫支票，如是者欠租四個月，教師Ｐ老婆唔抵得，打電話去追問，租客竟然講：「Ｐ太，×××六千蚊有拖冇欠啦，數目好大咩，等我返香港先至講。」講完收線，Ｐ太為之冇符，教師Ｐ向投資Ｍ呢位收租專家訴苦，投資Ｍ立即打電話畀佢相熟嘅收數公司，叫佢哋代收。
呢個世界係欺善怕惡嘅，一個星期之內，收數公司已經收效，教師Ｐ收到租客寄來支票六千元。教師Ｐ大開眼界之餘，讚嘆連聲，Ｐ太就面青青咁問收數員：「你哋唔係去淋紅油呀嗎？唔好累親我哋兩公婆！」收數員話：「你放心，我哋只係打咗一個電話去租客嘅公司搵人事部經理詢問租客在大陸邊一個城市啫。人事部經理話係私隱，唔講得，反問我係邊個。我講明代表收數公司，想話搵佢哋位同事傾幾句啫，傾乜嘢就係私隱，唔可以透露，我冇其他嘢講過呀！」教師Ｐ大嘆租客敬酒不飲飲罰酒，俾公司人事部知道咗，file花晒啦。