肥馬因病辭職，商務及經濟發展局局長急於搵人頂上，煲呔親自過問、親自掛帥都搵唔到外人加盟，惟有向公務員招手，搵該局常秘劉吳惠蘭接任。劉太有幸由政務官AO變身問責局長，常秘之位隨之出缺，牽一髮動全身又引發新一輪官場音樂椅遊戲。
劉太脫離公務員隊伍做局長，AO職系多咗一個最高級嘅D8位要填補，D8高官月薪逾20萬元，論資排輩，AO隊伍中有十幾二十人有資格進佔，其中約三分一已經做緊署理常秘，餘下由於被視為未夠火喉，或者其他原因，好似入錯馬房諸如此類，據講短期內升官機會不大，至於誰人咁夠運紮職，官場消息指現任創新科技署署長嘅陳育德，好有可能係接替劉太，係商務局常秘大熱人選之一。
陳育德同劉太有交情
劉太同陳育德同期加入政府，官場人士透露兩人私交不俗，又先後做過食物環境衞生署署長同影視處，有AO認為，陳育德並非好有觀眾緣星級官員，若非劉太做局長，而佢又同劉太有交情，相信未必有運行；更好彩係佢仲有兩年左右先退休，因為慣例一般唔會俾仲有年幾時間就咬糧嘅人升職，俾多啲機會後輩好過，因此陳育德今次認真行運，天時、地利、人和齊晒，旁人唔「恨」得咁多。
陳育德能否標尾會，要到揭盅之日先分曉，有官員指出，陳育德做食環署署長時，爆出孔雀石綠毒魚、蘇丹紅毒蛋流入香港事件，要公開道歉平息民憤，後來匆匆調任創作科技署，近幾個月比較少曝光，呢啲往績隨時令佢臨尾香，江湖傳聞現任港府駐美總經貿專員方舜文都係商務局常秘熱門，方舜文早兩個月先升正D6級，如果再升常秘，真係可喜可賀。
官場小道消息稱，其實大家預計旅遊事務專員區璟智會係下一個升職D8嘅高官，如果俾陳育德爬頭，都真係幾令人意外。
一般估計區璟智下一站係財經事務及庫務局，因為該局常秘何鑄明今年內夠鐘退休，區璟智以前做過財經事務及庫務局副秘書長，兜個圈升正做常秘合情合理。
mailto:[email protected]