自由黨噚日下晝，突然為九龍西支部主席田北辰發出澄清聲明，聲明內容，竟然係否認參選。事緣田二少日前同記者吹風，名為講吓資歷架構問題，實際上係博見報，噚日有報紙就指佢「宣佈」參選，由於一「宣佈」參選，一舉一動都可能要計入選舉經費，田二少想繼續利用灰色地帶，所以要急急澄清指報道錯誤，強調自己只係積極考慮中，仍未作最後決定云云。
田二少對選舉經費咁緊張，視佢為頭號對手嘅梁美芬「鼠王芬」一於少理，噚日以西九新動力名義，包場請學前弱能兒童睇《功夫熊貓》，今日就舉辦「認識奧運親子一天遊」，有得玩有禮物派，鼠王芬咁闊佬，所為何事路人皆見，唔知選管會點同佢計數呢？