鬧新碟荒呀，點算？本來7、8月份屬暑假檔期，大製作應該一輪輪上市先係，但偏偏連續兩星期都係拍晒烏蠅，真死火！據講，「元凶」又係同奧運有關，唔理咁多，冇超新辣片奉上，倒不如轉個話題，今日睇吓兩套最近推出嘅港產Blu-ray質素係點，再等AV專家Alan從荷李活製片角度出發，為大家畀啲專業意見！
記者：陳國輝
攝影：伍慶泉
《如果．愛》
導演：陳可辛
演員：張學友、金城武、周迅
畫面：16：9
聲效：DTS-HD、DolbyDigitalEX5.1
《放．逐》
導演：杜琪峯
演員：張家輝、任達華、吳鎮宇
畫面：2.35：1
聲效：DTS-HD、DolbyDigitalEX5.1
Round1
暗位層次
睇咗都未必知，原來兩套片經常出現室內同埋黑夜場景，即俗稱嘅「黐地」問題，呈現高清後質素如何？Alan就話：「以《如果．愛》街景為例，就算打燈師傅亦好難將成條街變光，唯一靠後期製作落力啲，綜觀整套戲喺暗位方面表現唔錯，頗見層次；但係《放．逐》就好唔聽話，可能係杜Sir鍾意玩Mood，畫面黑得嚟太黐地，淨係見張耀揚冇晒頭髮，衫嘅質地又唔清楚就知！」
Round2
雜訊
唔一定黑位先有，日光日白亦可以出現，關鍵亦在於後期製作。Alan即搵《無間道》Blu-ray為例子：「嘩，佢認真失敗！唔關製作事，據講拍攝嗰陣已經勁多Noise，注定出Blu-ray情況亦差唔多。《放．逐》嘅雜訊雖然冇咁得人驚，但只要從細微處着眼，亦唔難見到有粉狀東西喺畫面上四圍走；《如果．愛》嘅Noise相比少啲，例如巴士內左邊一排座椅，黑位附近就出現咗少量喇！」
Round3
顏色
從顏色濃度嚟講，《放．逐》屬於偏高，現時畫面只不過調校喺Balance以下，如果調正常番，肯定會有偏紅情況；至於膚色表現亦只係麻麻哋，以何超儀面部變化為例，就算有Lighting協助，臉色竟然仲變到一笪笪，欠層次之餘，變化亦唔多。至於《如果．愛》表現就好得多，尤其周迅塊面勁「上妝」，面色變化比較自然。睇得出打燈方面好有心機。
Round4
細緻度
所謂細緻度，就係包括咗線條實唔實淨或者有冇鬆矇現象，令觀眾睇得唔清楚嘅地方。以《放．逐》為例，Alan話呢隻Blu-ray嘅表現大致上唔錯，大部份時間除咗黑位不太理想，近鏡如人臉線條，以及紋理質感都尚算合格。至於《如果．愛》喺呢方面亦不過平平無奇，甚至乎有時候會失準，例如金城武冷帽上出現少許模糊，其實戲內亦不時有類似情形，不妨留意。
總結
《如果．愛》大勝！
聽完Alan一番話，大家咪以為兩隻Blu-ray真係咁差、咁得人驚喎！佢今次講明以荷李活電影作評價標準，雖然好嚴格，但相對其他港產Blu-ray，其實已經係水準之上。究竟兩地表現又係咪差咁遠？佢最後話：「其實分別只係鬥錢、鬥器材啫！」
