「萬人迷」碧咸喺07年由西甲轉戰水準低過英冠聯嘅美職聯，雖則喺足球事業上係降咗grade，但喺事業發展方面就越撈越掂，而且層面闊過以前好多，唔再淨係sell靚仔樣，一家大細都啱睇，所以就連魚油丸亦搵佢做代言人。
酬金過百萬鎊
𠵱家效力洛杉磯銀河嘅碧咸樣靚身材正，不嬲做開鬚刨、運動服裝同埋內褲等消費產品嘅代言人，而我求大俠亦見得多，但係估唔到佢𠵱家連健康產品都掂埋，真係問你服未。我求大俠收到風好似仲話今次嘅代言費仲少過其他產品㖭，有過百萬鎊，而經一輪明查暗訪之後，知道碧咸佢做咗GO3魚油丸嘅代言人，真係令我求大俠呆咗一呆。
家陣經已33歲嘅碧咸自己就解釋話係因為佢係運動員嘅關係，所以細細個就已經知道均衡飲食營養對健康嘅重要性咁話喎，加上佢都知𠵱家好多小朋友都有偏食嘅習慣，所以決定做對身體有益嘅魚油丸代言人，希望啲小朋友會因為佢食魚油丸而健康啲。話時話，除咗小朋友，魚油丸都啱後生女食，家陣佢可以做代言人，證明佢嘅影響力好闊，真係老幼咸宜。
慈父形象拍住畢彼特
唔知大家有冇發覺，自從碧咸去咗美國發展之後修心養性咗，好少再聽到佢搞三搞四嘅負面新聞，得閒都係帶3個囝囝去睇吓NBA捧吓效力洛杉磯湖人嘅老友拜恩場，成個廿四孝老竇咁款，所以佢早排拍住畢彼特（BradPitt）同埋尊尼特普（JohnnyDepp）等，齊齊被選為星級好爸爸，真係實至名歸。講真，碧咸個慈父形象真係越嚟越深入民心，話唔定碧咸遲啲做埋紙尿片代言人㖭呀！咸哥，你係得嘅！