睇完某報某評論員分析一百億只能捐多而不能捐少的文章，直覺認為，香港唔捐一百億，就等如欠大耳窿，隨時遭人上門噴油威脅斬你全家！四川有冇咁惡？汶川你熟唔熟？唔熟就要聽評論員點條明路過你行，立法會議員記得醒醒定定，批錢絕對要多、快，千祈咪省！假如捐款托手踭，睇完評論員分析，不排除下列惡果會出現：
自由行和「屍爬」即時叫停，湧港熱錢凍過水，消費零售市場全部食西北風，將來的西九文娛區勢必成為鑽石地皮魚蛋檔。
中央摸底，知道特區咁反骨，定性曾蔭權是知恩不報的小人，打算在奧運馬術賽兼殘奧完晒事後，即刻算賬，要曾蔭權比董建華更無面地，做跛腳馬，夾住馬屁股滾離場。
香港有千億儲備都唔肯捐一成出來，擺明睇四川唔起，在內地豪富一方的廠佬和所有自覺有銀用的闊佬第日想叫川姑替他們服務，恐怕都幾難過關。你做初一我十五，香港嫖客識時務者，趕快變身做說客，搞掂民主派議員，幫汶川袋一百億落袋。至於說監管筆錢點用，OK，再捐另一個一百億用來打老虎，實一Q中的！