Cash-Kai？Cash-Cow？日產剛到港嘅全新車系Qashqai，雖然讀法勁蹺口，但膽敢由外形到性能都追住波子架Cayenne嚟打，着實有啲料到；呢部由歐洲Design、喺日本Hit番轉頭嘅Q版Cayenne，2.0公升一樣爆得起，就連啱啱喺珠海贏咗房車賽冠軍嘅James，試過車之後都連環狂讚：「套懸掛好得！」
記者：梁美甜
攝影：陳盛臣
鳴謝：JamesTang
慳油玩樂新車型
日產Qashqai早喺07年已正式喺歐洲市場推出，以一部CompactCrossover玩樂車形象而大賣，進而回銷日本一樣咁Hit，以Dualis之名喺短時間搶到唔少市佔率，唔夠貨賣，要好似超跑咁落訂排WaitingList！代理強調Qashqai集Hatchback嘅靈敏輕巧同操控，以及SUV嘅高重心、大空間車型兼具穩重可靠駕駛感覺，仲有車身配置嘅環保引擎同波箱。到港型號為MR20DE2.0電油偈，搭配XTRONICCVT無段變速連加減波箱，提供駕駛樂之餘仲好慳油，就連James聽到係呢個波箱都知會慳油，犀利！
跑車風口性能高
James掃咗唔少房車賽同甩尾賽獎盃，啱啱喺珠海贏埋HKCCN2000房車賽冠軍兼被邀往馬來西亞試車，返港一落機就趕嚟將軍澳試架Qashqai。「外形好Sporty，唔似日本車，遠睇好有Q版CayenneFeel。」James甫落車已脫口而出。Qashqai的確係歐洲設計，就連側鏡線條都有九分似Cayenne。James急不及待揭頭冚：「咦？風口造得好似跑車咁，好靚，唔似一般2,000c.c.車咁喺沙板式車底度，部車性能係咪好高？」我都等緊你試喎！James從容笑一笑坐上駕駛席，第一時間調校軚環位置：「呢個位造得好就手，幾面鏡位置幾好，易睇位，OK喎……嘩！個天窗好大好靚，成家人行高速望住個天實好開心，夜晚睇煙花都一流。」
莫講話James，大多數人都被Qashqai個無敵大天幕吸引，1,040mm乘880mm大、6mm厚阻熱阻紫外線嘅全天幕仲延伸到後排㖭，比一般同類車大上一倍咁滯，亦大大提升車廂空間感。
喜出望外高性能
正式開車，「唔，好易睇位，起步轉數飆得好高，一波加速個波箱反應都好快，仲上緊。部車唔跳好平穩，個避震都算舒服，估唔到喎。」天雨路滑，去到彎位以為James收油慢入，殊不知車底傳來響胎聲，「高速入彎好定喎，車身高入急彎易失控，但部車好快就直軚入番線，剛性好好，操控比想像中有驚喜。」
「起步快轉數高扭力強，好大可能同佢個風口位有關，好正，指向性好高好準，簡單扭軚都入到線。」突然一個轉彎，即時拋咗出去，「座椅好夠承托力。」其實跑椅已加強兩側支撐力，我左右Fing只因我筆錄緊啫。鍾意改吓車嘅車神可有改Qashqai衝動？「諗唔到！或者改大啲個軨，型啲囉！」
a.3D立體Xenon頭燈附有自動開關功能，加埋又大又圓霧燈，為車頭營造唔少動感。
b.車廂空間寬敞，車頂及腿部活動空間充足。
c.側鏡指揮燈、車側及尾門電鍍飾邊均為Option，NoPayNoGoods囉！
d.內裝設計簡約，我就稍嫌過於膠感。
e.鋁金屬三環式儀錶板。
f.首飾箱附有風口位，可放食物或飲料。
g.全新傾斜附有吸震筒設計嘅行李箱，放得落兩個大行李篋。
落場實睇Qashqai
車迷除可以趁今、明兩日車展，率先一睹Qashqai真身之外，同場選購指定型號MPV，如Lafesta、Serena等型號，可以半價買油券，最多可以慳成$5,000！
地點：九龍灣日產旗艦陳列室
時間：10am-7pm
規格
引擎：1,997c.c.直四CVTC
馬力：137ps/5,200rpm
扭力：20.4kgm/4,400rpm
傳動：XTRONICCVTM-6連六前速+/-波
查詢：合誠汽車（22621088）