小藍早排去咗油麻地MKI超級數碼廣場，搵咗悅星多媒體嘅老友周革生，講吓點樣平玩國產膽機。前幾日小藍行過商場咪上去逛吓，周仔話小藍個blog一出街，即刻多咗人上去試聽膽機，先發覺原來咁多香港人有興趣玩膽機。
平線傳聲冇咁通透
周仔話，膽機最吸引人嘅地方，啲聲好有女人味；正所謂女人唔補好易老，膽機加啲補品，啲聲仲靚啲，女人味更濃啲。乜嘢補品咁巴閉？佢笑笑口話，簡單到一條喇叭線都好緊要；玩AV擴音機，唔係咁發燒，買條普通線就得，但玩膽機聽兩聲道，一條好嘅喇叭線，影響音色就好大。
吓，我用緊條線好cheap，一米都係賣10幾蚊。小周話，呢啲咁平嘅銅線好多雜質，傳遞啲聲冇咁通透，但一啲6N銅靚線，純度高，出嚟啲人聲特別滑，背照音樂聲嘅雜音又少啲，樂器層次感又強，加埋晒啲聲就靚好多。不過，外國品牌嘅靚線，閒閒哋成3,000蚊條，貴啲成萬蚊都有；但玩國產靚線三、四百蚊有交易。小周跟住攞條好似手指公咁粗喇叭線出嚟，駁埋膽機即場試畀小藍聽，啲聲真係同Cheap線好唔同，音場唔單止闊咗，啲人聲圓潤咗同通透咗，好鬼死突出。幾嚿水唔係貴，但係啲聲改善咗，小藍都心郁郁想買國產靚線玩吓。
逢周五刊出