大家不時睇《警訊》，一定覺得一啲騙徒手法老套笨拙，但永遠有人中招，正因為咁，先至有騙徒不斷利用舊橋搵食，只是橋唔怕舊，最緊要受也。
上星期五，一位中環公關L在街上碰到左丁山，大家傾咗一陣，佢話趁五點與人客開會之前，到德己立街三聯書店一行，睇陣書先。後來佢來電話買咗兩本魯迅、徐志摩，書店之內有好多人喎。
到咗星期六夜晚，公關L來電驚呼：「唔見咗張AE卡與銀行提款卡同埋電話簿。」咁就弊咯，佢講嘅故事似足警訊，損失超過五位數字，大家在中環行走（可在各區），要小心保護銀包至得。左丁山日常所見，好多女士孭住一個大袋（或手袋），袋無拉鏈，或不拉埋拉鏈，有心人在旁一望，就知道女士嘅銀包放在那裏，據消息人士講，畢打街就係文雀黑點，佢哋嘅搵食好地方。
話說公關L在「三聯」買書付款之時，將大袋放在地上，碌完卡，就將信用卡放回銀包，銀包擺落大袋，眼睛望住售貨員，冇留意旁邊及附近人客。到星期五晚上吃飯找數之時，打開銀包，銀紙全在！吓，獨係唔見咗AE卡與銀行提款卡，立即搜查大袋，發覺電話記事簿唔見埋。於是立即打電話報失，CardCentre報告，已有人前往海鮮酒家、名時裝店珠寶店碌咗三次卡，最後到快餐店碌卡，CardCentre認為消費模式奇異，可能事不尋常，立即截停，公關L計吓數，慘矣，止蝕之時，可能已經唔見咗五位數字。
點知到咗星期六下午竟然有人打入公關L之手機，對公關L講：「我係某某銀行九龍分行客戶服務經理，一位好心市民今日交回從街上執到嘅提款卡，係你嘅，我哋驚住有不法之徒從你銀行戶口提走款項，想同你仄吓戶口，你𠵱家講個password畀我，我立即同你仄清楚。」哎吔，星期六下午銀行經理仍然辦公？公關L腦海一閃，諗番《警訊》情節，立即同對方講：「你貴姓名呀，唔該留低手機號碼，我立即打番畀你。」對方立刻收線，公關L手機上無對方來電顯示。打電話去銀行24小時服務中心一查，當然知道並無其事！