大K郭炳湘獲法國政府頒授最高榮譽嘅榮譽軍團勳章，噚日喺法國駐港總領事戴博（Jean-PierreThebault）官邸接受殊榮，咁高興嘅事，郭老太、大少奶Wendy齊齊亮相，一班世叔伯、老友，包括大Sir鍾士元、飛哥、吳光正、寶哥哥、霍震寰、滙豐鄭大班夫婦、賭王燊哥、胡應湘等都有捧場，至於兩個細佬，就唔多覺眼有現身，正印出場，Ida喺邊仲使多問？
表揚推廣法國藝術
法國厚待大K，其中一個原因，係新地幾年前夥拍長實競投西九文藝區時，同法國龐比度中心有合作協議，一度計劃將龐比度引入香港，04年又穿針引線，安排被譽為法國國寶嘅畢加索真迹《巡遊》放喺IFC展出，成為城中盛事。
戴博噚日讚揚郭炳湘唔止係出色商人，仲好熱心將法國文化藝術帶嚟香港，促成私營機構與法國政府成功合作；雖然唔使再搞西九，不過大K話期望日後雙方一齊推動兩地溝通同合作。法國榮譽軍團勳章1802年由拿破崙設立，表揚社會各階層、國籍有卓越成就人士，港大校長徐立之舊年獲頒此殊榮。