信科技？還是信自己？要爭論，肯定各有支持者！不過如果主題係汽車導航系統，唔使講，「梗係信自己！」所以，對住皇冠呢套聲稱係特別針對香港環境而研發嘅汽車導航系統，行家同事個個半信半疑。至於我，一個認路白癡，絕對抱開放態度，靠唔靠得住？最好係實試搵答案。結論係，原來信與不信之間最累事！
記者：黎頌詩
攝影：陳陶鈞
豐田Picnic精裝版（配備SG+導航/娛樂系統）
售價：$198,900（限量50部）
GPS借歪！
衞星導航一向喺香港無市場，最大原因係唔多可靠。香港地方細且天橋交錯、高樓林立，衞星信號經常受干擾，指路變老點，見怪不怪。不過今次呢個「SG+導航/娛樂系統」放棄以GPSSensor作主力，反而以探測車速嘅感應器及判斷行駛方向嘅陀螺儀得出數據，再計算行車路線，衞星信號只發揮走錯路重新定位嘅輔助功能。
除咗引路，更有齊藍芽、後泊鏡頭，以及可透過MS槽同硬碟聽歌睇戲等功能。首批「SG+導航/娛樂」系統會隨Picnic推出，而豐田旗下嘅Alphard350及Previa亦可升級此設備。
實試報告
測試一：空曠郊區 跟足法例唔識執生
蘋果大樓→龍蝦灣
龍蝦灣勁偏僻，如果系統覆蓋範圍唔夠廣，肯定即時穿崩；輸入目的地，系統幾乎即時指出適當路線。我故意唔聽指示，喺環保大道轉入蓬萊路，系統喺約兩秒間重新修正，攞分！跟住無驚無險，一直駛到清水灣道落大清水嘅迴旋處，雖然沿途系統喺指示迴旋處出口一項上表現異常突出，不過呢個位竟然出事，「依指示」靠左竟然即時發現行錯路！系統一直沉默，只顯示車輛所在……不過路窄無法掉頭，也沒岔路，惟有向前，結果去到大坑墩前無去路可以掉頭。折返先前走錯嘅地方系統再次開金口，結果……由原路離開？開始好迷惘，直到銀線灣迴旋處才指示折返！原來系統無錯，依正交通法例的確要咁行，但我諗香港人執生能力咁高，一早搵咗避車處U-turn。如是者，第二次返到錯誤位，今次金睛火眼睇真路口，原來，窄小嘅龍蝦灣路的確喺左邊，係我哋先入為主兩次走漏！事實證明，靠晒科技就掉以輕心，一樣唔掂！
測試二：密集鬧市 老點入觀塘塞鑊勁
龍蝦灣→九龍灣展貿
今次會經過繁忙又塞車嘅觀塘區，大廈密集、天橋重叠，典型香港環境、GPS剋星！經過先前經驗，今次我決定信晒導航，一於死跟！離開將軍澳隧道，系統指示入觀塘道。放工時間觀塘道肯定塞爆，畀着我會上天橋行繞道。
不過咁反而有機會見識到系統喺天橋底嘅功力，沿途追蹤準確無甩轆。塞完一輪，終於可以踩油，興奮得滯又揸過龍！睇睇佢點修正，小心翼翼聽佢點，兜兜轉轉穿過新蒲崗工業邨旁小路，再重搵正確方向，然後……唔知去咗邊。突然，目標出奇地在眼前！車上兩人齊齊呼掂！
總結實試結果，呢套導航應該係市面最強之選，雖然都會出現指示唔夠清晰嘅情況，不過最大嘅問題似乎係人腦不時會同佢作對，喺自主同依賴之間，最易出現問題。
Picnic變聰明
唔少人認為，面世多年但外貌並無大變嘅Picnic欠缺新鮮感，不過我始終覺得曾係香港MPV人氣王嘅Picnic，作為家庭車應有嘅實用賣點瓣瓣齊；載齊一家大細有老有嫩，舒適度最重要，三排座椅各自的空間感都算理想，後排亦不見過於壓迫。搬運能力亦不遜，摺平中後排載物量確極為可觀。「師奶都舞得掂」可以話係對Picnic操控性嘅最佳概括，容易駕馭且表現平穩，最適合擔任日常座駕角色。稍嫌佢過於斯文欠缺加速爆發力，今次有埋聰明導航，售價依然Keep住20萬有找，有分加！
規格
引擎：1,998c.c.直4VVTI
馬力：163bhp/5,000rpm
扭力：19.6Kgm/4,000rpm
傳動：4前速自動波
查詢：皇冠汽車有限公司（28661020）