肥馬「誤墮塵網」六年，發現腦病後向煲呔請辭，噚日最後一日返工告別政府，今日開始離職前休假，上次佢宣佈辭職時，直指親疏有別做法行唔通，係香港政不通、人不和癥結，可能唔想再寸親煲呔，噚日佢不再多言，話雖然自己唔做官，但希望大家「再見亦是朋友。」
最後一個工作天，肥馬都十分忙碌，朝早去禮賓府開會，中午就同下屬食飯，傍晚6點半左右先收工，據講佢轄下多個部門首長、常秘都有參加佢個告別派對，大家知佢為食，所以買咗好多地道小食畀佢，包括缽仔糕、煨番薯。有關人士可算十分有心思，事關要喺中環買呢兩樣嘢，都幾考功夫。
臨別前攞番個尾彩
六年前肥馬喺政府總部鞠躬道歉，當日相信係佢做官最慘痛日子，噚日佢喺同一個地方講拜拜，不過今時唔同往日，佢快閃離開煲呔政府，宣佈辭職後民望急升，支持率高達55%，喺局長之中僅次於保安局局長李少光，反觀煲呔民望卻跌完又跌，最新數據顯示，肥馬支持度高過煲呔近10個百分點，肥馬真係攞番個尾彩，衣錦榮「歸」咯。
市民對肥馬評價咁高，佢表示好感謝市民支持，又指香港市民眼睛係雪亮嘅，對於能夠加入政府服務市民感到好光榮，更係佢一生中最光榮嘅事。告別官場，肥馬話會去蘇格蘭打高爾夫球，貪當地球場冇高球車坐，行足兩個月希望瘦身而歸，調理好身體後，或會喺其他崗位服務香港。外界盛傳商務及經濟發展局常務秘書長劉吳惠蘭，獲煲呔向中央推薦接班，肥馬噚日冇證實消息，稱相信政府會搵到能幹嘅人接手佢嘅工作。
手腕圓滑嘅肥馬好頭好尾，透露煲呔畀咗封信佢，內容不便公開，而特首夫人則親手寫咗三個大字「壽而康」畀佢，佢好感謝曾太祝福，肥馬又承諾送《蝙蝠俠──黑夜之神》戲飛畀採訪記者。
市民忽然咁支持肥馬，固然同佢政績有關，更重要嘅係佢直斥煲呔親疏有別手法，說出市民心底話，正如肥馬講，香港人好公道，眼睛亦好雪亮，煲呔民望低殘，豪擲幾十億元賑災，頻頻落區親民都冇起色，可見市民對佢真係好大怨氣，唔係經濟問題咁簡單，只是忠言逆耳，煲呔會否納諫就冇人知嘞。
mailto:[email protected]