我哋國奧隊嘅實力雖然不濟，但就行運一條龍，連日內不停收到好消息。首先係早前教練杜高域因高血壓搞到唔係幾舒服，不過近日已經冇事；最開心嘅梗係同組對手巴西，隨時因球會唔肯放人實力大減。巴西冇咗「細哨」、廸亞高等人，但係咪代表國奧出線好景？咁又未必！
巴塞隆拿拒放細哨
早前阿根廷宣佈強陣參戰奧運，巴西嗰邊一於都唔示弱，前日宣佈羅賓奴、朗拿甸奴、廸亞高、柏圖等人都喺名單之內。之不過，近日事情突然來個大逆轉，巴塞隆拿講明為咗強陣備戰歐聯外圍賽，喺7月14日要「夫添」參加季前集訓，所以唔會畀朗拿甸奴出戰奧運。聽講阿根廷嘅美斯可能遭遇同一命運，有排講數。
「細哨」唔獲巴塞放人，基本上可以講已經減低球隊唔少實力，同組嘅國奧開香檳都嚟唔切。點知開完香檳仲有乳豬切㖭，因為雲達不來梅嘅中場廸亞高，同埋史浩克04嘅守將拿菲爾都不獲球會放人，呢勻國奧仲唔係中六合彩？
但係中國球迷又唔好咁快開心住，事關國奧雖然有鄭智、李瑋峰同陳濤等人領軍，不過佢哋呢排真係踢得鬼死咁差，聽講操練嗰陣仲激到杜高域紮紮跳㖭！家陣中國天氣炎熱，每日攝氏平均高達30幾度，搞到班球員體能嚴重下降。
國奧練射門冇腳中
原本國奧定喺下晝4點喺龍井體育場嘅操練，都因天氣問題要改喺5點後進行。嘩！天氣熱咪當訓練體能囉，少少苦都捱唔到，點代表我哋偉大嘅祖國呀？最衰嘅係，班球員喺練凌空抽射環節，竟然42次射門冇次入網，就連杜高域都頂唔順話：「你班死仔，我哋咁樣點贏波呀？」唉，巴西擺明讓晒車馬，國奧自己都要爭氣先得㗎；如果分組賽已經出局，冇得再賴其他嘢啦？