人稱柯大俠嘅恒生（011）大班柯清輝，曾經因為被傳媒揭發有個紅顏知己，激到柯太好勞氣，婚姻亮紅燈，不過經過柯大俠一番努力維繫，不時同太座十指緊扣周圍去，撐枱腳之餘又去馬場，總算成功箍煲。
噚日柯大俠仲透露，一出花紅同雙糧，會即時交晒畀太座。舊年柯大俠大收600萬銀特別花紅，有咁大筆錢，柯太乜氣都消啦！
投資理財方法少
柯大俠噚日出席由廉署主辦、恒生贊助嘅「財富與人生」錄像短片創作比賽啓動禮，佢喺台上同一班學生哥分享對財富嘅睇法，喺學生發問環節，柯大俠被問到一個好尖銳嘅問題，就係「你點用啲花紅同雙糧？」柯大俠好老實咁答：「會將啲錢交晒畀屋企，銀行會自動轉賬，呢頭收到花紅，嗰頭就轉畀太太。」
用得自動轉賬，柯大俠每個月份糧，應該都會自動轉去柯太戶口囉，不過柯大俠跟住話，投資之前太太都會問佢意見，話晒都係專業人士嘛。
咪以為做銀行嘅，投資機會同花款會比人哋多，柯大俠就形容自己嘅理財方法「好boring」，花款唔多，而且保守，佢話一定唔可以輸咗個本。佢解釋，做銀行有好多限制，買股票後90日內唔可以賣，因為銀行唔鼓勵投機。同時，恒生有好多上市公司客戶，有晒客戶資料，所以若然買上市公司客戶嘅股票會好敏感，亦要申請，所以佢唔會買。
四個仔重要過財富
財富對於柯大俠嚟講，其實唔係金錢，佢講笑話，「我唔係有錢，只係打工仔，專業人士唔會搵到好多錢。」佢覺得最富足係佢有四個仔；柯大俠話，見到佢哋長大成人，又有成就，做老竇就最開心。華華覺得柯大俠有樣野珍貴過財富但冇講到，咪係柯太囉，睇佢咁緊張太座就知啦。
電郵：mailto:[email protected]