海峽兩岸在七月四日開始周末包機直航，大陸遊客共七百五十三人從北京、上海、廣州、南京及廈門五城市到台灣旅行。南方航空董事長劉紹勇親自駕駛航機，到咗桃園機場後對記者講：「回家的感覺真好。」我哋聽到，仲以為劉紹勇係台灣本省人㖭，相信唔係啩？一啲旅客話：「這一刻，我們等了六十年。」
年逾八十嘅Ｃ老先生睇完新聞，幾乎流出眼淚，問佢為何如此激動，Ｃ老話：「想當年，國共內戰末期，解放軍即將佔領廣州之時，我哋一班同學分為三派，大難臨頭各自飛，我與女同學漏夜坐火車嚟香港投奔鄉親，在香港結婚。一位最好同學決心等待黎明，迎接新中國，報效國家。另一位好朋友走咗嚟香港，跟住去咗台灣，追隨國軍。一九五○年之後，我哋就失去聯絡。我在香港生活由艱苦至安康，至仔女讀完大學，𠵱家兒孫滿堂，六十年來自問好幸福。去咗台灣嗰位，二十年後成為見報官員，相信官職幾高，但佢從來唔肯回覆我寄去台灣嘅信，可能有苦衷，現在已經死咗。留在廣州嗰位，在反右期間被打為右派，捱盡苦楚，文革期間再被鬥爭，唔知點解被迫講出佢有一位同學在台北，因為嗰位同學已成為台灣官員，死咯，廣州同學立即被重重拷問，有內通台諜嘅嫌疑，捱唔到四人幫垮台，佢就過身。嗚嗚，眨眼六十年，廣州人卒之可以往台灣旅行，假如我兩位廣州、台北同學尚在，我哋三人一齊在台北重逢，你話幾好呢！」
六十年，一個花甲子，確實好耐，六十年後回望一九四八、一九四九年嘅事情，老人家不勝唏噓，覺得所有戰爭都好無謂，乃係野心家爭奪權力、爭奪資源、以意識形態、宗教之名而發動嘅。為甚麼宗教、主義而發狂之知識分子，乃係同謀兇手。譬如越戰，越戰「英雄」麥凱因如當選總統，到河內訪問，見番當年拷打佢嘅越共，唔通打番兩槌乎？都係握吓手，回憶當年戰爭之荒謬性啫，歷史洪流可以冲淡一切仇恨，浪淘盡千古風流人物，凡事諗吓六十年後會是甚麼世界，乜都唔想同人爭，更加冇仗打。