參選有損兄弟情，白鴿黨副主席單仲偕顧全大局、孔融讓梨、退位讓賢、自我犧牲，忍痛作出艱難決定，迫不得已棄選港島，加上唔會連任資訊科技界，12年議會生涯無奈結束，噚日出席最後一次立法會大會。
告別議會，單仲偕並不顯得太傷感，可能想到日後唔使開咁多會，唔使對住廢噏高官強顏歡笑都唔定，噚日更特別預訂一隻燒豬髀，帶埋私伙圍裙同刀叉，親自喺立法會記者室操刀分豬肉請記者食。
肥馬低調怕臨尾香
單仲偕未有透露日後去向，笑言有興趣去大班個新電台開咪。大班同佢在公在私都好多火花，如果一齊開咪，效果難以想像。民建聯李國英「掹衫尾」做咗四年議員，大家知唔知佢任內做過乜呢？唔知好正常，總之佢冇得再做，要讓位陳克勤。佢聲言自己間律師樓因佢做議員做少好多生意，希望日後搵番夠本。
因病辭職嘅肥馬局長，噚日都係最後一次出席立法會，佢話好唔捨得，又笑言議員冇因為佢唔撈而錫住佢，問題依舊尖銳，唔知係咪怕功高震主臨尾香，肥馬噚日表現好低調，對於自己民望急升問題封口不談。