中央政府曲線托市，點托法？噚日《東方早報》報道，內地監管部門為咗「保衞」股市穩定，已經限制基金公司經理喺奧運前出境，要佢哋留喺國內，專心穩定股市。搞到內地班基金經理唔可以去夏威夷，只能去海南島；去唔到歐洲感受異國風情，只可以去青島。
海外培訓計劃告終
呢種另類「調控」，當然惹嚟一班基金經理怨聲載道，因為唔少人諗住喺嚟緊嘅暑假，陪屋企人出國旅遊輕鬆吓，當中最熱門係去東南亞享受陽光與海灘，但家吓內地監管部門一句以大局為重，穩定壓倒一切。
咪話假期計劃泡湯，就連到海外培訓都唔得，報道話有個基金經理就被監管部門否決咗出外培訓，仲同佢講：「這種時期怎麼能出國？」想喺奧運前出國都冇乜可能。
聽基金經理話，有基金公司為咗唔做箭靶，更保持低調，取消奧運前一切event，唔搞投資講座，同海外股東只用電話交流，基金公司寧願賺少啲都好過做箭靶。