恒地（012）推出新福利，男員工享有侍產假，不過得3日，呢方面就唔及四大會計行安永，事關佢哋噚日正式推出性別包容計劃，畀男女管理層靈活安排工作時間，例如男士喺太太生BB後，可以申請停薪留職（最長兩年），女士如果要多啲時間湊仔，亦可減少每周上班時間。
安永大中華區人力資源主管合夥人周昭媚話，希望計劃可以挽留人才，減少流失。安永上年流失率約16%。
佢又話，呢幾年會計行出現女多男少嘅失衡（大中華區嘅女員工佔67%），女性到咗結婚或生小朋友後，有啲為照顧家庭同小朋友而辭職，個計劃就係為挽留呢班高層而設，但男士都可申請，佢哋會逐一同申請人傾，度吓邊個方式最適合。不過，若係減少返工時間，人工會按比例減少，福利就唔變。
周昭媚指，失去一個有經驗嘅會計管理人才，重新培訓新員工嘅成本好貴，所以寧願畀佢哋彈性安排返工。