德國爛路彈波子　45度碌上山

「一定要搶到PDK！」係今日落Track最大信念，為咗盡情一試其誇張起步方式，一定要成功。嘩，跑道上有好多波子，Targa4、CaymanS、BoxsterS6MT、CarreraS6MT、CayenneTurbo……點解無最新配有PDK波箱嘅911系列？「揸911落場劈咁大想頭？」身邊傳來嘲笑聲，無所謂，揸架CayenneS碌上45度斜坡一樣咁刺激！

記者、攝影：梁美甜
鳴謝：JebsenMotorsLtd-PorscheCentreHK

OFF-ROAD　陡坡爛泥夠精采

Porsche於廠方另一邊開闢咗一大片草原愛嚟玩Off-road，超過百畝草原上只有6公里做車道，遠望有如走進南非草原玩safari。大家全程以CayenneS測試，每部配有Off-roadPackage，包括氣壓懸掛系統、電子加力箱、電子輔助系統、雙差速器鎖定等，走進呢個佈滿沙石凹凸不平嘅路段、深淺不一嘅水氹泥沼、唔同斜道嘅窄道等等，乜嘢惡劣Off-road都玩齊。
當中最驚險唔係自己揸緊玩緊，而係望住前面部車諸多阻滯嗰陣，好似上45度大斜坡，前面部車突然喺坡中停滯不前，空波不斷飛咗唔少沙石出嚟，嗰一刻，大家同一時間：「我哋使唔使退後啲，安全啲喎！」係！到我哋上，咦？過咗喇！「定住慢落斜速話咁易喇！」到望向前見唔到地面嘅大陡坡，仲要拖住1波放手咁盡？CayenneS扭力強，加上配備嘅PTM及PASM輔助系統自行介入，車身以持續而穩定嘅速度拖住落，刺激到暈！或許早知道CayenneS特強嘅懸掛及內置輔助系統，開放地感受駕馭體驗絕對唔係繁忙都市中能擁有，爽！

■呢班年輕技術員Set好晒先進行Off-road狠試，肯定夠安全。

■雖然有Instructor拉龍帶頭示範，但崎嶇惡劣路面仍令我有點擔心。

■逐部逐部排隊上山，我心情就越嚟越緊張。

■好似磚地咁嘅路非裝飾用，要嚟試避震一流。

■Off-road路段變化多，體驗CayenneS嘅性能極限。

ON-ROAD　狂放盡享快感

一知道今次德國Trip有On-offRoad試車，就一廂情願以為大會大方到安排最新嘅911畀大家落Track㖭，殊不知……唔緊要，起碼可以試盡各款波子，仲係落Track玩，部部都係好多人心目中嘅DreamCar嚟㖭喎！
On-road喺全長3.7公里嘅Run-inTrack進行，驟眼睇唔複雜，其實Porsche方面已經融入好多高難度彎位入去喇，好似俗稱手臂彎、白鴿彎咁喇；千祈咪以為真係落Track比賽，由於跑道大前提係為駕駛者了解同掌握所駕駛汽車嘅性能同操控性，所以由PorscheSportDrivingSchool導師帶頭之下，以唔同速度及路線進入各個彎道，隨住所換嘅車種就會掌握到每部車嘅加速、操控、入彎、個人應變等等反應，由第一次坐上去Targa4到Cayenne，總共轉過六次，但人數多最終都只係試咗3部車！除咗Cayenne之外，幾部車都飆得痛快，尤其係車身隨雙手轉軚方向而即時作出反應，以及強而有力嘅快感之外，從中亦知道個人入彎出彎時掌握時間同速度嘅技巧、方法、反應表現等。