「富貴於我如浮雲」呢句說話，唔係個個富豪都做得到，但對於股神畢菲特嚟講，就絕對係身體力行。美國證監文件披露，畢菲特喺上個禮拜二，即7月1日回歸當日，將51.2萬股巴郡B股，捐咗畀3個慈善基金，以當日巴郡B股嘅3999美金收市價計算，呢批股份價值高達20.5億美金（即160億港銀），認真大手筆。
喺呢筆股票捐贈中，以畢菲特嘅死黨、微軟前執行主席蓋茨同佢老婆梅琳達成立嘅慈善基金，分得最多，達45.1萬股巴郡B股，約值18億美金（即140億港銀）。
其實早喺06年，畢菲特已經講過會捐1000萬股巴郡B股，畀蓋茨嘅慈善基金，另外100萬股會捐去以佢首任太太個名命名嘅慈善基金，至於分別由佢3名子女睇住嘅3個慈善基金，就會各分得35萬股巴郡B股。