𠵱家百物騰貴，豬牛羊米樣樣加價，連華華最愛嘅大家樂（341）「一哥焗豬扒飯」，都已經由26蚊加價至28大元，仲要唔係成日有得供應，經常攞啲疑似「一哥焗豬扒飯」嘅「鴛鴦焗飯」頂檔。今年適逢係大家樂集團40大壽，華華即時問主席陳裕光有咩嘢回饋長期顧客。
點知個答案真係令華華異常失望。陳生話，回饋顧客要經過marketing部門深思熟慮咁研究，唔可以一次過送杯紅豆冰畀客戶咁馬虎了事，跟住又話𠵱家一直有做Club100五餐送一餐優惠……佢講咗大半日，身為長期忠實粉絲嘅華華都係理解唔到顧客有咩40周年優惠。
不過，陳生轉頭就講，集團𠵱家有成8億銀cash喺手，唔排除再派高息回饋股東，加上40周年誌慶，真係隨時隨地派發特別息都唔奇喎，陳生跟住笑晒口賣關子，「希望有好消息」啦！睇嚟做大家樂股東好過做客喎！