大班鄭經翰四年前被迫封咪，轉戰直選以為可以喺立法會繼續發聲，但呢個舞台又點滿足到名嘴吖，所以佢今年唔連任專心辦新電台，不過佢夠義氣，拍心口幫社民連陶君行上位，傳聞佢會資助100萬元競選經費。
噚日大班出席社民連誓師活動時對此不置可否，只係話會幫阿陶籌旗，「總之籌到夠為止」；阿陶話暫時未收過分毫。大班走出熱廚房份外風騷，噚日主動開盤，話估計泛民今年可力保23席，陳太唔選先扣一席，會計界譚香文都冇得留低，新界西泛民應該少一席，一般認為陳偉業同高達是但一個被叮走。雖然只係牙骱戰，不過大班對自己眼光似乎好有信心，話最少一賠一，甚至一賠四都受。