我求大俠成日聽人講「夏日炎炎正好眠」，不過我認為係「夏日炎炎正好『游』」先啱呀。大佬，一年先得嗰幾個月係炎夏，喺咁熱嘅環境下唔游水真係好浪費呀！所以我間唔中都有去游吓水，不過呢幾日都落雨，搞到我個假期游水計劃都受到影響。既然自己無得游，惟有上網睇番近期好hit嗰個美國奧運游泳遴選賽當望梅止渴啦！
連贏50同100米自由泳
諗住喺京奧打破史畢茲喺72年慕尼黑一屆贏咗7金呢個紀錄嘅費斯，果然好順利咁攞到8個賽事（連接力賽）嘅參賽資格，不過我求大俠唔覺得有咩出奇，一早都預咗費斯得㗎啦。反而最令我驚奇嘅係41歲嘅阿媽級泳手杜莉絲（DaraTorres）竟然連贏50米同100米自由泳冠軍，成為女飛魚，仲要打破埋50米自由泳嘅美國紀錄，真係唔到你唔服。你要知道，游水賽事嘅50米同100米賽事就好似田徑項目嘅100米短跑咁，真係少啲爆炸力都唔得；但係有個兩歲大囡囡嘅杜莉絲除咗身形keep得咁fit之餘，仲可以游到咁好嘅成績，我求大俠直頭要封佢做偶像呀！
美國史上最老奧運泳手
我再上網睇真啲杜莉絲啲資料，真係嚇親我呀。原來杜莉絲之前已經玩過4次奧運，仲喺84年洛杉磯奧運已經攞咗人生中第一枚奧運金牌；將會喺今夏參加京奧嘅杜莉絲仲會創造出兩項美國歷史，第一係成為美國史上最老嘅奧運游泳選手，第二就係成為美國史上第1個出席過5次奧運嘅選手㖭；唔怪得佢近期係美國仲hit過費斯啦。
其實費斯都欣賞杜莉絲㗎，佢話游泳運動員要接受好艱苦嘅訓練，杜莉絲嘅成功真係好值得人尊重咁話。呢位百厭星仲講笑咁話杜莉絲可以做得佢阿媽㖭！