莎莎(178)創辦人郭太羅桂珍攞咗「傑出女企業家大獎」，噚日一家五口總動員去領獎，郭太好開心話個獎好有意義，尤其記得廿年前，有晚喺中環間舖執貨到凌晨三四點，報檔都準備開工佢先至收工，呢啲辛酸史至今難忘。
做老公嘅郭少明亦話，創業初期最辛苦，禮拜日兩公婆都冇得休息同大女、二仔出街玩，直到細仔出世後，先開始有禮拜日Familyday，佢有啲感慨咁話，冇乜時間陪仔女。
不過呢啲都係過去，見到太太今日有咁大嘅成就，郭生好識做咁話，除咗一家人食飯慶祝外，仲喺澳洲買咗隻馬畀太太，名叫「漂亮第一」；郭太好冧咁話，「郭生想佢老婆漂亮第一啩。」呢個名亦係莎莎今年30周年嘅口號，係取代退役嘅「終身美麗」，希望「漂亮第一」9月中可以出賽。