噚日公佈中一派位結果，因為「八萬五」而一夜成名嘅藍田循道衛理小六學生鄭皓澄，獲派第二志願皇仁書院，雖然入唔到首志願九華，但都好滿意啦，即時通知父母報喜。皓澄哥哥陪細佬拎派位結果，哥哥話連加拿大親戚都喺網上睇到細佬參賽，堪稱揚威國際。
揸實拳頭等結果
皓澄全級考第一，不過噚日等結果時揸實拳頭，又不時咬唇，似乎好緊張，八方事後問佢，佢卻話唔係太緊張，只係小動作啫。佢又強調，其實自己真係唔識咩係「八萬五」，更好激動咁話，「緊係唔知啦，知我就唔會咁答，你估我想喺個比賽度搞笑咩！」
人怕出名，自從「八萬五」問答比賽片段出街後，班主任將個網址傳畀全班同學睇，皓澄話令佢俾同學笑到面黃，個個笑笑口拍佢膊頭話：「喂，天才學生八萬五喎！」搞到佢鬼咁尷尬。連小學生都識「八萬五」禍害，相信冇人再敢批評通識教育冇用，「八萬五」話唔定遲吓變埋「潮語」㖭！