北京忽然沒收八方同事蔡元貴回鄉卡，事件變成國際新聞，令人見識到有中國特色嘅新聞自由，原來係咁一回事，中共箝制輿論、只准報喜、不准報憂嘅本質，唔會因為奧運火炬傳到中國，鳥巢、水立方懸掛五環而改變。
北京違反申奧承諾，突然變臉，連香港高官都受牽連出醜。民政事務局常任秘書長尤曾家麗噚日開記者會，介紹分別位於沙田及維園嘅奧運文化廣場時，被《蘋果》記者當面質問港府如何處理「蔡元貴事件」，肥尤一聽到呢個問題，面色驟變，驚到好似佢俾人無緣無故沒收回鄉卡咁。
答問題超級無厘頭
收卡事件發生後，港府一直迴避回應，煲呔都唔敢多口，連特首都噤若寒蟬，肥尤更加識做啦，佢噚日忽然星爺上身，九唔搭八超級無厘頭咁話，香港市民可以去沙田或者維園觀看奧運比賽，因為兩個奧運文化廣場，喺奧運期間每日開放12小時，播放各項賽事，市民可以免費睇奧運。
肥尤咁講都得!?八方以為自己聽錯，《蘋果》記者問佢沒收回鄉卡、限制採訪奧運事件喎，佢竟然話可以去維園睇電視!?呢單嘢牽涉新聞自由大是大非原則，係一個國家有否信守承諾嘅誠信問題，唔係湊熱鬧睇比賽，買唔到飛入場而搵高官求助嗰啲私人糾紛喎，肥尤唔係聽唔明啩，定係扮聽錯呢？
《蘋果》依正手續向奧組委申請採訪，北京反口落閘，根本侮辱咗奧運精神，唔係擺個大電視出嚟俾人睇轉播就可以補數，習近平副主席訪港時，交帶特區管治班子施政要「通情達理、團結高效」，唔通用電視轉播取代新聞採訪，就係通情達理？
習近平指令港府要「通情達理」，呢兩日政壇官場一窩蜂猜測四字真言含義，呢亭揣摩上意遊戲，留番畀高官政客花心機，八方只想問習副主席，無端端沒收一個香港公民回鄉卡，通唔通情呢？禁止記者採訪奧運，合唔合理呢？
mailto:[email protected]